Մեզ հաջողվել է շրջափակել Ռուսաստանի հարավը․ Զելենսկի

Ուկրաինայի նախագահ Վլադիմիր Զելենսկին հայտարարել է, որ քաղաքական, ֆինանսական և տեխնոլոգիական որոշումների շնորհիվ երկիրն անցել է առավել առաջադեմ պաշտպանության:

Անցյալ աշնանից ի վեր կայացված քաղաքական ու ֆինանսական որոշումների, ինչպես նաև մեկ տարի առաջ կատարված տեխնոլոգիական ընտրության արդյունքում Ուկրաինային հաջողվել է այս ձմռանն ու գարնանը նշանակալիորեն ավելի առաջադեմ տեխնոլոգիական պաշտպանություն իրականացնել, հայտնել է Վլադիմիր Զելենսկին։

Նրա խոսքով՝ երկարաժամկետ պատժամիջոցների ծրագիրն իրագործվում է, իսկ միջին հեռահարության հարվածներն ավելանում են։ Ուկրաինայի նախագահը նշել է, որ իրենց հաջողվել է փաստացի շրջափակել Ռուսաստանի հարավը, և այդ ռազմավարական գործողությունն ընդլայնվում է ի պատասխան ուկրաինական նավահանգիստների ու քաղաքների վրա հասցվող ռուսական հարվածների։ Նա ընդգծել է, որ Ռուսաստանի վրա ճնշումը պետք է այդ երկրին ու նրա հասարակությանը մոտեցնի պատերազմն ավարտելու ցանկությանը։

Զելենսկին հավելել է, որ պատժամիջոցները ՌԴ նավթավերամշակման գործարանների ու նավթային այլ օբյեկտների դեմ, միջին հեռահարության հարվածները ռազմական լոգիստիկային, ինչպես նաև գործողությունները Սև ու Ազովի ծովերում նվազեցնում են Ռուսաստանի ռազմական ներուժը, ինչը կարևոր է շարունակել քաղաքական ու իրավական քայլերով։

Նա նաև տեղեկացրել է, որ սահմանվել է ուկրաինական պատժամիջոցների փաթեթ ընդդեմ այն ընկերությունների ու նավերի, որոնք տեղափոխում են Ուկրաինայի օկուպացված տարածքներից հափշտակված հացահատիկն ու այլ ապրանքներ, ինչպես նաև նախապատրաստվում են նոր սահմանափակումներ Ռուսաստանի ռազմական արդյունաբերության, ֆինանսական շղթաների և միջնորդների նկատմամբ։