Հութիները հրթիռներով և ԱԹՍ-ներով հարվածել են Եմենի նահանգին․ կան զոհեր

Եմենի «Անսար Ալլահ» շարժումը (հութիներ) հայտարարել է Մարիբ նահանգի «Սահն Ալ-Ջին» ռազմական ճամբարի ուղղությամբ զանգվածային հարվածներ հասցնելու մասին։

Շարժման զինված ուժերի հայտարարության համաձայն՝ հարվածներն իրականացվել են մեծ թվով հրթիռներով և անօդաչու թռչող սարքերով։

«Մեծ թվով հրթիռներով և անօդաչու թռչող սարքերով հարվածներ են հասցվել «Սահն Ալ-Ջին» ճամբարում թշնամու ուժերի կուտակումներին, ինչպես նաև պահեստներին, տեխնիկային և ռազմական սարքավորումներին», — ասվում է հայտարարության մեջ։

Հութիները նշել են, որ հարվածները հասցվել են սաուդյան ուժերի և նրանց աջակցող խմբավորումների տեղաշարժերին հետևելուց հետո։ Շարժումը հայտարարել է, որ շարունակելու է հարվածներ հասցնել ռազմական օբյեկտներին։

Ավելի վաղ տեղական ռազմական աղբյուրը հայտնել էր, որ «Անսար Ալլահ»-ը Մարիբի ուղղությամբ արձակել է 15 հրթիռ։ Տեղական իշխանությունների տվյալներով՝ հարձակման հետևանքով երկու մարդ զոհվել է, ևս 14-ը՝ վիրավորվել։