«Հայկական դրոշով հաղթական շրջանը հպարտության պահ էր»․ Ջանես Նազարյան

Աշխարհի կրկնակի չեմպիոն Ջանես Նազարյանը, ամփոփելով մրցելույթը, նշել է, որ լարվածությունը պայմանավորված էր ոչ թե մրցավայրով, այլ պատասխանատվության մեծ զգացումով։

Նրա խոսքով՝ մարզիչների հետ լավ աշխատանք էին կատարել, իսկ թույլ տված որոշ սխալները չեն ազդել վերջնական արդյունքի վրա։ Նազարյանը հատկապես առանձնացրել է եզրափակիչ գոտեմարտը, քանի որ այն չի ընթացել նախապես մշակված պլանով։

«Սկզբում սխալներ թույլ տվեցի և միավոր զիջեցի, բայց մարզիչներիս հանգստության ու հուշումների շնորհիվ կարողացա վերադարձնել հաղթանակը»,- ասել է նա։

Մարզիկն ընդգծել է, որ երկրորդ անգամ չեմպիոն դառնալն ավելի դժվար էր, քանի որ այս անգամ բոլոր մրցակիցներն արդեն հատուկ պատրաստվել էին իրեն հաղթելու համար։

«Եթե անցած տարի մի քանի հոգի էին աշխատում ինձ վրա, այս տարի՝ բոլորը։ Այդ պատճառով մարզիչների հետ հաղթանակի մի քանի տարբերակ էինք մշակել»,- նշել է Նազարյանը։

Անդրադառնալով հաղթանակից հետո հնչած սուլոցներին՝ նա ասել է, որ դրանք իրեն չեն հետաքրքրել։

«Այդ պահին ինձ համար ավելի կարևոր էր վայելել հաղթանակը։ Դրոշով շրջանը հպարտության ու հուզմունքի պահ էր․ երջանիկ եմ, որ կարողացա հասնել դրան»,- եզրափակել է Ջանես Նազարյանը։