Ռուսաստանը վերադառնում է միջազգային ասպարեզ ևս մեկ մարզաձևում

Ֆունկցիոնալ բազմամարտի միջազգային ֆեդերացիան (IFFF) վերացրել է ռուս մարզիկների նկատմամբ գործող բոլոր սահմանափակումները՝ թույլատրելով նրանց միջազգային մրցումներում հանդես գալ Ռուսաստանի դրոշի և օրհներգի ներքո։ Այդ մասին հայտնում է ՏԱՍՍ-ը՝ հղում անելով Ռուսաստանի ֆունկցիոնալ բազմամարտի ֆեդերացիայի մամուլի ծառայությանը։

Որոշումն ընդունվել է այն բանից հետո, երբ հուլիսի 7-ին Միջազգային օլիմպիական կոմիտեն չեղարկել էր Ռուսաստանի օլիմպիական կոմիտեի որակազրկումը։

Այսուհետ ռուս մարզիկները կկարողանան մասնակցել միջազգային մրցումներին որպես Ռուսաստանի ներկայացուցիչներ, ինչպես նաև վերադառնալ թիմային մրցումներին։ IFFF-ն ակնկալում է, որ Ռուսաստանի հավաքականն արդեն այս մրցաշրջանում կմասնակցի Masters շարքի մրցումներին և աշխարհի առաջնությանը։

Մոտակա Masters մրցաշարը կանցկացվի հոկտեմբերի 22-25-ը Արուբայում, իսկ աշխարհի առաջնությունը՝ դեկտեմբերի 11-13-ը Շոտլանդիայի Գլազգո քաղաքում, որտեղ կարող է հանդես գալ մինչև 15 ռուս մարզիկ։

Ռուսաստանի ֆունկցիոնալ բազմամարտի ֆեդերացիայի հոգաբարձուների խորհրդի նախագահ Սերգեյ Երեմինը որոշումն անվանել է կազմակերպչական և դիվանագիտական աշխատանքի մեծ հաջողություն՝ նշելով, որ ռուսական կողմը նաև առաջարկել է Ռուսաստանում անցկացնել 2022-ին չեղարկված աշխարհի առաջնությունը, Աշխարհի բաց գավաթը և միջազգային ուսանողական մրցումներ։