Եկեղեցու վրա հարձակումը ուղիղ հրահանգ է, որը իշխանությունները կատարում են․ Կարապետյան

Իշխանությունների՝ Հայ առաքելական եկեղեցու ներքին գործերին միջամտելու և հասարակության հոգևոր հիմքերը քայքայելու փորձերը ընդդիմությանը ստիպեցին անցնել ակտիվ գործողությունների։ Այս մասին օգոստոսի 24-ին լրագրողների հետ զրույցում հայտարարել է խորհրդարանի ընդդիմադիր «Ուժեղ Հայաստան» խմբակցության ղեկավար Նարեկ Կարապետյանը։

Պատասխանելով ընդդիմադիր պատգամավորների անզիջում բողոքի պատճառների մասին հարցին՝ Կարապետյանն ընդգծել է, որ իրենց ակտիվության կատալիզատորը հենց իշխող թիմի գործողություններն են դարձել։ «Իշխանությունների հայտարարությունները «պատերազմի կուսակցության» մասին սովորական քաղաքական պնդումներ են, որոնք որևէ հիմք չունեն։ Քաղաքական ասպարեզում նման բաներ պարբերաբար են հնչում, դրանք միայն զարմանք են առաջացնում, և ամեն նման հայտարարության համար բողոքի դուրս գալու անհրաժեշտություն պարզապես չկա։ Սակայն մեր բողոքը դառնում է անզիջում, երբ քաղաքական ամբիոնն օգտագործվում է հոգևոր արժեքների վրա հարձակումների և Եկեղեցու գործերին ուղղակի միջամտության համար, ինչը խստիվ արգելված է Սահմանադրությամբ։ Իշխանություններն իրենք դարձան այն կատալիզատորը, որը մեզ ներքաշեց այս քաղաքական գործընթացների մեջ», - ասել է Կարապետյանը։

Արձագանքելով վարչապետ Նիկոլ Փաշինյանի այն մեղադրանքներին, թե ընդդիմությունը իբր գործում է Ռուսաստանից ստացված ցուցումներով, ինչպես նաև մեկնաբանելով «Հայաստան» դաշինքի գործընկերների հետ հարաբերությունները, նա կոչ է արել ուշադրություն դարձնել իշխանությունների իրական օրակարգին և պահպանել քաղաքական կոռեկտությունը։ «Եկեղեցու վրա հարձակումը ուղիղ հրահանգ է, որը նրանք կատարում են։ Որպեսզի հասկանանք, թե ներկայիս իշխանություններն ում հանձնարարություններն են կատարում, բավական է մտնել X և տեսնել ադրբեջանական առաջին դեմքերի հրապարակումները. պարզ կդառնա, թե մեկ շաբաթ անց ինչի մասին են խոսելու Հայաստանի իշխանությունների ներկայացուցիչները։ Մենք կտրականապես չենք ընդունում այն օրակարգերը, որոնք մեր երկիր են ներմուծվում մի պետության պատվերով, որը իր սերունդներին դաստիարակում է հայերի նկատմամբ թշնամանքի ոգով», - եզրափակել է Նարեկ Կարապետյանը։