«Վարչաֆեստ 2026»-ը կանցկացվի Սևանի ափին․ մրցանակային ֆոնդը՝ 10 մլն դրամ

 Կառավարության հուլիսի 30-ի նիստում ԿԳՄՍ նախարար Ժաննա Անդրեասյանը տեղեկացրել է, որ այս տարի օգոստոսի 21-22-ը Սևանա լճի ափին կանցկացվի «Վարչաֆեստ 2026» մրցույթ-փառատոնը, որը նախատեսվում է դարձնել ամենամյա: Նախատեսվում է կիրառել «Սևան ստարտափ սամիթի» համար օգտագործված տարածքը, քանի որ այն հարմարեցված է խոշոր միջոցառումների կազմակերպման համար:

Նախապատրաստական գործընթացը մեկնարկել է, և մոտ 100 բենդ արդեն հայտ է ներկայացրել: Մասնակիցների աշխարհագրական ընդգրկումը ներառում է Երևանը, Հայաստանի բոլոր մարզերը, ինչպես նաև հայտեր են ստացվել Ավստրիայից ու Կանադայից: Մասնագիտական ժյուրիի ընտրությամբ մրցույթին կմասնակցի մոտ 20 բենդ:

Նախարարի խոսքով՝ տարածքը բաց է լինելու քաղաքացիների համար, և նախատեսվում է տեղադրել 30 տաղավար, որտեղ կներկայացվի մարզի տնտեսվարողների արտադրանքը: Սա կնպաստի, որ փառատոնն ունենա զգալի տնտեսական ազդեցություն տարածաշրջանի զարգացման համար: Զբոսաշրջության տեսանկյունից ակնկալվում է ավելի քան 3000 այցելու, ինչը Սևանի ափին նոր իրադարձություն կհանդիսանա և լավ հարթակ կդառնա տարածաշրջանի զարգացման համար:

Մրցանակային ֆոնդը կազմում է 10 միլիոն դրամ, որը կբաշխվի առաջին, երկրորդ և երրորդ տեղերը զբաղեցրած մասնակիցների միջև: Բենդերի կազմը պետք է ունենա նվազագույնը 3 անդամ:

Վարչապետ Նիկոլ Փաշինյանն իր հերթին նշել է, որ պետք է խթանել երիտասարդների ստեղծագործականությունը՝ հավելելով. «Ընդհանրապես քաղաքական ազատությունները և ժողովրդավարությունները ունենում են կարևոր էֆեկտներ, և էֆեկտներից մեկը ստեղծագործականության զարգացումն է, այդ թվում՝ երիտասարդության շրջանում»: