Մոսկվան հայտարարեց՝ Կիևի հարձակման թիրախում հայտնվել են Ղազախստանն ու ԱՄՆ-ը

Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ հուլիսի 30-ի գիշերը ուկրաինական անօդաչու թռչող սարքերը հարվածներ են հասցրել Նովոռոսիյսկում՝ Կասպյան խողովակաշարային կոնսորցիումի ծովային տերմինալի մերձակայքում գտնվող նավթատարներին։

ԿԽԿ-ի մամուլի ծառայության տվյալներով՝ թիրախավորվել են օտարերկրյա դրոշներով նավերը, որոնց անձնակազմերը միջազգային են, իսկ վարձակալները՝ արտասահմանյան մատակարարներ։ Բեռնառաքողների թվում է նաև ամերիկյան Chevron ընկերությանը պատկանող Tengizchevroil-ը, որը մասնակցում է Ղազախստանից էներգակիրների մատակարարմանը։

Հարձակման հետևանքով տուժածներ չկան։ Բռնկված հրդեհները մարվել են, նավթի արտահոսք չի արձանագրվել։ Միաժամանակ ԿԽԿ-ն ստիպված է եղել կրկին դադարեցնել նավթի բեռնումը։

Զախարովան պնդել է, որ Ուկրաինայի գործողությունների հետևանքով տուժում են նաև Կիևի գործընկերներ համարվող Ղազախստանի և ԱՄՆ-ի տնտեսական շահերը։

«Կիևի ռեժիմի ղեկավարը փորձում է իր ահաբեկչական արկածախնդրության մեջ ներքաշել հնարավորինս շատ երկրների և ընդլայնել հակամարտության ծավալը»,- հայտարարել է ՌԴ ԱԳՆ ներկայացուցիչը։

Նրա խոսքով՝ Վաշինգտոնում չեն կարող չնկատել, որ Վլադիմիր Զելենսկին, մի կողմից, խոսում է հրադադարի և հակամարտության կարգավորման մասին, իսկ մյուս կողմից՝ թույլատրում է հարձակումներ միջազգային վառելիքաէներգետիկ շղթաների և այն երկրի ակտիվների վրա, որից քաղաքական, ռազմական ու ֆինանսական օգնություն է խնդրում։

ՌԴ ԱԳՆ-ն ակնկալում է, որ ԱՄՆ իշխանությունները «համարժեք գնահատական կտան» Զելենսկու վարած քաղաքականությանը և կզսպեն նրան։ Մոսկվան նույնպիսի արձագանք է սպասում նաև ՄԱԿ-ից ու միջազգային այլ կառույցներից։