Մարտունու տներից մեկում արջի քոթոթ են հայտնաբերել

Մարտունիում քաղաքացին շների հարձակումից փրկել է ՀՀ Կարմիր գրքում գրանցված անդրկովկասյան գորշ արջի մոտ 4 ամսական քոթոթի և տեղափոխել ապաստարան։

2026 թվականի հուլիսի 28-ին, մոտավորապես ժամը 12:20-ին, Բնապահպանության և ընդերքի տեսչական մարմնի Գեղարքունիքի տարածքային բաժինը ահազանգ է ստացել Մարտունի քաղաքի բնակիչ Վ.Վ.-ից՝ հայտնաբերված արջի քոթոթի մասին։ Տեսչական մարմնի աշխատակիցները տեղում պարզել են, որ Մարտունի-Գետափ ավտոճանապարհի 15-րդ կիլոմետրին քաղաքացին նկատել է ՀՀ Կարմիր գրքում գրանցված անդրկովկասյան գորշ արջի շուրջ 4 ամսական ձագի, որին սպառնում էր 6-7 շների հարձակումը։ Վ.Վ.-ին հաջողվել է կանխել կենդանուն սպառնացող վտանգը և նրան տեղափոխել իր տանը կից օժանդակ շինություն։շ

ԲԸՏՄ տեսուչների կատարած արտաքին զննման արդյունքում կենդանու մարմնի վրա վնասվածքներ չեն հայտնաբերվել։

ՀՀ Կարմիր գրքում գրանցված անդրկովկասյան գորշ արջի քոթոթի պատշաճ խնամքն ապահովելու և հետագայում նրան վայրի բնություն վերադարձնելու նպատակով՝ կենդանուն նույն օրը փոխանցել են Վայրի բնության և մշակութային արժեքների պահպանման հիմնադրամին (FPWC)։ Այնուհետև նրան տեղափոխել են Վայրի կենդանիների փրկարար կենտրոնի՝ հատուկ ձագերի համար նախատեսված ապաստարան։