Իրանը մերժել է ԱՄՆ-ի առաջարկը՝ այն համարելով անընդունելի

Իրանը մերժել է ԱՄՆ-ի ներկայացրած առաջարկը՝ այն գնահատելով որպես չափազանց կոշտ պահանջներ պարունակող։ Այդ մասին հայտարարել է Իրանի արտգործնախարարի տեղակալ Քազեմ Ղարիբաբադին։

Նրա խոսքով՝ Վաշինգտոնը նախազգուշացրել էր, որ եթե առաջարկը մերժվի, բանակցությունները կհամարվեն ձախողված, և ամերիկյան պատվիրակությունը կհեռանա բանակցություններից։ Ըստ պաշտոնյայի՝ հենց այդպես էլ տեղի է ունեցել։

Ղարիբաբադին նաև նշել է, որ Թեհրանը չի պնդել բանակցությունների շարունակման անհրաժեշտությունը՝ ընդգծելով, որ դա վկայում է «Իսլամական Հանրապետության արժանապատիվ դիվանագիտության» մասին։

Օմանում կայացած հանդիպումը տեղի է ունեցել այն բանից հետո, երբ Իրանը կրկին փակել էր Հորմուզի նեղուցը։ ԱՄՆ-ն պահանջել էր, որ բանակցությունների ավարտից առաջ բաց մնա հարավային այլընտրանքային երթուղին, սակայն Թեհրանը չի համաձայնել այդ պայմանին։

Հիշեցնենք, որ հուլիսի սկզբին ԱՄՆ-ն հարվածներ էր հասցրել Իրանի ավելի քան 80 օբյեկտների՝ որպես պատասխան Հորմուզի նեղուցում տանկերների վրա իրականացված հարձակումներին։ Թիրախում էին հակաօդային պաշտպանության համակարգերը, ռադիոլոկացիոն կայանները և այլ ռազմական օբյեկտներ։

Իրանի ԶՈւ կենտրոնական «Խաթամ ալ-Անբիա» շտաբը դրանից հետո հայտարարել էր, որ ԱՄՆ-ի հարվածներին կտա վճռական պատասխան։