ԱՄՆ-ը վերանայում է Եվրոպայում իր զորքերի տեղակայումը

ԱՄՆ պաշտպանության նախարարությունը սկսել է վերանայել Եվրոպայում ամերիկյան զորքերի տեղակայման հարցը։ Այդ մասին X սոցիալական ցանցում հայտնել է ԱՄՆ պաշտպանության նախարարի քաղաքական հարցերով տեղակալ Էլբրիջ Քոլբին։

Նրա խոսքով՝ վերանայման նպատակն է ապահովել, որ ՆԱՏՕ-ն արագ անցում կատարի այն մոդելին, որտեղ եվրոպական դաշնակիցները կստանձնեն իրենց պաշտպանության հիմնական պատասխանատվությունը՝ սովորական սպառազինությունների կիրառմամբ։

Քոլբին նշել է, որ նախաձեռնության մեկ այլ նպատակ է ձևավորել, այսպես կոչված, «ՆԱՏՕ 3.0»՝ վերականգնելով դաշինքի դերը որպես հզոր ռազմական կազմակերպություն։

Նրա խոսքով՝ Եվրոպայում ԱՄՆ ռազմական ներկայության վերանայումը հիմնված կլինի ԱՄՆ 2025 թվականի Ազգային անվտանգության ռազմավարության և 2026 թվականի Ազգային պաշտպանության ռազմավարության վրա՝ հաշվի առնելով ներկայիս աշխարհաքաղաքական և ռազմական իրողությունները։

ԱՄՆ նախագահ Դոնալդ Թրամփը և պաշտպանության նախարար Փիթ Հեգսեթը բազմիցս քննադատել են եվրոպացի դաշնակիցներին՝ պաշտպանական ծախսերը բավարար չափով չավելացնելու համար։

Հիշեցնենք, որ 2025 թվականի հունիսին ՆԱՏՕ-ի անդամ երկրները համաձայնել էին մինչև 2035 թվականը պաշտպանական ծախսերը հասցնել ՀՆԱ-ի առնվազն 3,5 տոկոսի, ինչպես նաև լրացուցիչ 1,5 տոկոս հատկացնել պաշտպանությանն առնչվող ծախսերին։

Ավելի վաղ ՆԱՏՕ-ի Եվրոպայում դաշնակից ուժերի գերագույն հրամանատար, ԱՄՆ ռազմաօդային ուժերի գեներալ Ալեքսուս Գրինկևիչը հայտարարել էր, որ երկարաժամկետ հեռանկարում հնարավոր է ամերիկյան զորքերի մի մասի տեղափոխում աշխարհի այլ տարածաշրջաններ՝ եվրոպական երկրների ռազմական ներուժի աճին զուգընթաց։