Թուրքիան ՆԱՏՕ-ի առաքելությանը մասնակցելու համար Էստոնիա կուղարկի 5 F-16 կործանիչ․ Hurriyet

Թուրքիան ՆԱՏՕ-ի՝ Բալթյան երկրների օդային տարածքի պարեկության (Baltic Air Policing) առաքելությանը մասնակցելու նպատակով Էստոնիա կուղարկի 5 F-16 կործանիչ և Թուրքիայի ռազմաօդային ուժերի 181-րդ էսկադրիլիայի 76 զինծառայող։ Այդ մասին հայտնում է թուրքական Hurriyet թերթը։

«Այս առաքելությունը ռազմավարական մեծ նշանակություն ունի ՆԱՏՕ-ի արևելյան թևի պաշտպանության շրջանակում։ Այն կարևոր ներդրում կունենա Թուրքիայի զսպման կարողությունների ամրապնդման, դաշնակիցների ուժերի հետ փոխգործակցության և ռազմավարական ներուժի բարձրացման գործում», — Anadolu գործակալությանն ասել է Թուրքիայի ՌՕՈւ փոխգնդապետ Օզդեմիրը։

Hurriyet-ի տվյալներով՝ առաքելությունը կիրականացվի ռոտացիոն սկզբունքով՝ օգոստոսից մինչև նոյեմբեր, և նախատեսում է Լատվիայի, Լիտվայի և Էստոնիայի օդային տարածքի պարեկություն, քանի որ այդ երկրները չունեն սեփական կործանիչներ։

Ավելի վաղ Bloomberg-ը հայտնել էր, որ ՆԱՏՕ-ն դիմել էր Թուրքիային՝ խնդրելով նախատեսվածից շուտ տրամադրել F-16 կործանիչներ Բալթյան երկրների օդային տարածքի պահպանության համար։ Ըստ հրապարակման՝ դաշինքը նախատեսում է իրականացնել հերթափոխ Էստոնիայում 2026 թվականի օգոստոսից մինչև դեկտեմբեր։

Նշվում է նաև, որ Թուրքիայի ռազմաօդային ուժերը նախկինում մասնակցել են ՆԱՏՕ-ի նմանատիպ առաքելություններին՝ Լեհաստանում (2021 թ.) և Ռումինիայում (2023–2024 թթ.)։