ԵՄ-ում չեն բացառում հրաժարվել Ռուսաստանի դեմ խոշոր պատժամիջոցների փաթեթներից․ FT

Եվրամիությունում քննարկվում է Ռուսաստանի դեմ պատժամիջոցների կիրառման մոտեցումը փոխելու հնարավորությունը այն բանից հետո, երբ Հունաստանը կասեցրեց նոր պատժամիջոցների փաթեթի ընդունումը։ Այդ մասին գրում է Financial Times-ը՝ հղում անելով եվրոպացի պաշտոնյաներին։

Պարբերականի տեղեկություններով՝ Բրյուսելում դիտարկվում է խոշոր պատժամիջոցների փաթեթներից հրաժարվելու և դրանց փոխարեն առանձին սահմանափակումներ կամ փոքր թեմատիկ բլոկներ ընդունելու տարբերակը։ Աղբյուրների գնահատմամբ՝ այդ մեխանիզմը թույլ կտա արագացնել նոր սահմանափակումների համաձայնեցումը և նվազեցնել առանձին երկրների կողմից վետոյի կիրառման հնարավորությունը։

Financial Times-ի տվյալներով՝ նախաձեռնությունն աջակցություն է ստանում ինչպես Եվրահանձնաժողովում, այնպես էլ Ռուսաստանի նկատմամբ առավել կոշտ դիրքորոշում ունեցող ԵՄ անդամ պետությունների շրջանում։

Հիշեցնենք, որ հուլիսի 23-ին Եվրամիությունը հաստատել էր Ռուսաստանի դեմ 21-րդ պատժամիջոցների փաթեթը՝ սև ցուցակում ընդգրկելով 170 կազմակերպություն և 48 ֆիզիկական անձ։ Սահմանափակումներ են կիրառվել նաև 94 ռուսական բանկերի և խոշոր ֆինանսական հաստատությունների, այդ թվում՝ Մոսկվայի բորսայի (MOEX) և Ռուսաստանի ԿԲ նախագահի տեղակալ Միխայիլ Մամուտայի նկատմամբ։ Բացի այդ, ԵՄ-ն մինչև 2027 թվականի հուլիսի 15-ը պահպանել է ռուսական նավթի գնի առավելագույն շեմը՝ 44 դոլար մեկ բարելի դիմաց։

Նույն օրը Ռուսաստանը հայտարարել էր, որ կպատասխանի ԵՄ-ի նոր պատժամիջոցներին՝ ընդգծելով, որ դրանք կբարդացնեն նաև եվրոպական երկրների սոցիալ-տնտեսական իրավիճակը։

Ավելի վաղ Financial Times-ը հայտնել էր, որ նոր պատժամիջոցների փաթեթի դեմ էին հանդես եկել Հունաստանը, Ֆրանսիան, Իտալիան, Գերմանիան, Ավստրիան և Պորտուգալիան։ Մասնավորապես, Հունաստանը պահանջում էր պահպանել ռուսական հեղուկ բնական գազի (LNG) երրորդ երկրներ փոխադրման հնարավորությունը, իսկ Ավստրիան՝ ապաշրջափակել մոտ 2 միլիարդ եվրոյի ռուսական ակտիվները՝ Raiffeisen Bank-ի նկատմամբ Ռուսաստանում կիրառված տուգանքը փոխհատուցելու նպատակով։