Ստամբուլում Աստվածաշունչ կարդալու համար բերման են ենթարկել ռուսաստանցի ամուսիններին

Թուրքիայի Ստամբուլ քաղաքում ռուսաստանցի ամուսիները ձերբակալվել են Այա Սոֆիայի մզկիթում Աստվածաշունչ կարդալու համար։ Նրանց տեղափոխել են օտարերկրացիների պահման կենտրոն, իսկ այժմ թուրքական միգրացիոն ծառայությունը քննարկում է նրանց արտաքսման հարցը։

32-ամյա Իգորն ու 35-ամյա Վիկտորիան Մոսկվայից ժամանել էին Թուրքիա հանգստի նպատակով։ Այա Սոֆիա այցելության ժամանակ Իգորը սկսել է բարձրաձայն կարդալ իր հետ բերած Աստվածաշունչը, որից անմիջապես հետո զույգին դուրս են բերել մզկիթից և տեղափոխել ոստիկանության բաժին։

Ռուսաստանցիների նկատմամբ հարուցվել է վարույթ Թուրքիայի քրեական օրենսգրքի 216-րդ հոդվածով, որը վերաբերում է կրոնական արժեքների հրապարակային վիրավորանքին, ատելության հրահրմանը և բնակչության խմբերի նկատմամբ թշնամանքի սրմանը։ Հոդվածը նախատեսում է մինչև մեկ տարվա ազատազրկում։

Վիկտորիան հայտնել է, որ տեղյակ չի եղել մզկիթում Աստվածաշունչ կարդալու արգելքի մասին և նշել, որ գիրքը կարդում էր միայն ամուսինը, իսկ ինքը պարզապես երբեմն նայում էր տեքստին։

Ավելի ուշ զույգին տեղափոխել են արտաքսման կենտրոն։ Իգորի խոսքով՝ իրեն և կնոջը բաժանել են, նրանք երկար ժամանակ սնունդ չեն ստացել և վատ ինքնազգացողություն ունեն։

ՌԴ գլխավոր հյուպատոսությունը Ստամբուլում հայտնել է, որ կապի մեջ է թուրքական իրավասու մարմինների, փաստաբանի և թարգմանչի հետ և վերահսկում է իրավիճակը։

ՌԴ Պետդումայի պատգամավոր Նիկոլայ Նովիչկովը հայտարարել է, որ ռուսաստանցիները որևէ հանցագործություն չեն կատարել և ընդգծել, որ Այա Սոֆիան ուղղափառ աշխարհի կարևորագույն սրբավայրերից մեկն է։

Հիշեցնենք, որ 2020 թվականին Թուրքիայի նախագահ Ռեջեփ Թայիփ Էրդողանի հրամանագրով Այա Սոֆիան զրկվել է թանգարանի կարգավիճակից և կրկին դարձել մզկիթ։ Այդ պատճառով քրիստոնեական արարողությունների անցկացումը կամ ոչ մահմեդական կրոնական գրքերի հրապարակային ընթերցումը թուրքական իշխանությունները կարող են գնահատել որպես հասարակական կարգի խախտում և հավատացյալների կրոնական զգացմունքների վիրավորանք։