Թուրքիայի կողմից Ռուսաստանից գնված Ս-400-ները վաճառվել են Պարսից ծոցի երկրներից մեկին

Թուրքիան Ռուսաստանից ձեռք բերած Ս-400 զենիթահրթիռային համակարգերը վաճառել է Պարսից ծոցի երկրներից մեկին։ Թուրքական իշխանամետ Hürriyet թերթի այս հրապարակման մասին հայտնում է ռուսական ՏԱՍՍ գործակալությունը։ 

«Իմ ունեցած տեղեկություններով՝ Ս-400-ները վաճառվել են երրորդ երկրի։ Գործարքի մասին կհայտարարվի այսօր։ Համակարգերն ուղարկվում են Պարսից ծոցի երկրներից մեկը։ Երեկ աշխատանքներ էին տարվում որոշ խնդիրների կարգավորման ուղղությամբ, և հաղորդվում է, որ դրանք լուծվել են մինչև կեսգիշեր։ Ոմանք նշում են Արաբական Միացյալ Էմիրությունները, մյուսները՝ Կատարը, սակայն ճիշտ կլինի սպասել պաշտոնական հայտարարությանը», – գրել է թերթի մեկնաբան Աբդուլքադիր Սելվին։

Թուրքիայի իշխանությունները դեռևս չեն արձագանքել հրապարակմանը։

Դրանից մեկ օր առաջ նույն Hürriyet-ը գրել էր, որ Անկարան փորձում է գտնել իրավական լուծում, որը կբավարարի ԱՄՆ-ին և թույլ կտա դուրս գալ CAATSA ամերիկյան պատժամիջոցների ազդեցությունից, ինչպես նաև վերադառնալ F-35 կործանիչների արտադրության ծրագրին։ Այդ նպատակով քննարկվում է Ս-400 համակարգերը Պարսից ծոցի երկրներից մեկին վաճառելու տարբերակը։ Oksijen թերթն իր հերթին որպես հավանական գնորդ նշել է Արաբական Միացյալ Էմիրությունները։

Հիշեցնենք, որ Թուրքիայի նախագահ Ռեջեփ Թայիփ Էրդողանը ՆԱՏՕ-ի գագաթնաժողովի շրջանակում ԱՄՆ նախագահ Դոնալդ Թրամփի հետ բանակցություններից հետո վստահություն էր հայտնել, որ Անկարան կվերադառնա F-35 ծրագրին։ Թրամփը, սակայն, հայտարարել էր, որ այդ հարցով դեռ վերջնական որոշում չի կայացրել։

Թուրքիան 2017 թվականին Ռուսաստանից գնել էր Ս-400 հակաօդային պաշտպանության չորս դիվիզիոն՝ շուրջ 2,5 միլիարդ դոլար արժողությամբ։ 2019 թվականի հոկտեմբերին «Ռոսօբորոնէքսպորտ»-ը հայտնել էր, որ մատակարարման պայմանագիրը լիովին կատարվել է։ Այդ գործարքից հետո ԱՄՆ-ն Թուրքիային բացառեց F-35 կործանիչների ծրագրից։