Կրեմլը արձագանքել է Թուրքիայի կողմից ռուսական զենքի հնարավոր վերավաճառքին

Պեսկով․ Մոսկվան Թուրքիայի կողմից Ս-400 համակարգերի վերավաճառքի հարցով շփումներ է ունեցել Անկարայի հետ։

Մոսկվայի և Անկարայի միջև քննարկումներ են տեղի ունեցել Թուրքիայի կողմից Ս-400 զենիթահրթիռային համակարգերի հնարավոր վերավաճառքի վերաբերյալ։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։

«Այս թեման չափազանց զգայուն ոլորտին է վերաբերում։ Մենք այդ հարցով շփումներ ենք ունեցել թուրքական կողմի հետ»,- ասել է Պեսկովը։

Նա նաև ընդգծել է, որ Ռուսաստանը շարունակելու է Թուրքիայի հետ երկխոսությունն այս հարցի շուրջ։

Ավելի վաղ թուրքական լրատվամիջոցները հայտնել էին, որ Թուրքիան կարող է Ռուսաստանից ձեռք բերած Ս-400 զենիթահրթիռային համակարգերը վաճառել Պարսից ծոցի երկրներից մեկին՝ Արաբական Միացյալ Էմիրություններին կամ Կատարին։ Միևնույն ժամանակ, հնարավոր գործարքի վերաբերյալ պաշտոնական հաստատում չի եղել։