Սլովակիայում Ֆիցոյին ցմահ վճարումներից զրկելու հանրաքվե է սկսվել

Սլովակիայում սկսվել է հանրաքվե, որով քվեարկության է դրված վարչապետ Ռոբերտ Ֆիցոյին ցմահ վճարումներից զրկելու հարցը։

Ինչպես տեղեկացնում է TA-3 հեռուստաալիքը, երկրի քաղաքացիները քվեարկում են նաև հանցավորության դեմ պայքարի ազգային գործակալության և հատուկ դատախազության վերականգնման օգտին, որոնք լուծարվել էին Ֆիցոյի կառավարության կողմից։ 

Այս գործընթացի սկիզբը դրել է լիբերալ արտախորհրդարանական «Դեմոկրատներ» կուսակցությունը, որին հաջողվել է հավաքել անհրաժեշտ 350 հազար ստորագրությունը։ Որպեսզի հանրաքվեի արդյունքները վավերական համարվեն, անհրաժեշտ է ապահովել 50 տոկոսից ավելի մասնակցություն։ Ներկա պահին, սակայն, ընտրողների մասնակցության ակտիվությունը խիստ ցածր է։ Ըստ Ipsos-ի իրականացրած հարցումների տվյալների՝ հանրաքվեն կարող է տապալվել, քանի որ քվեարկելու իրավունք ունեցող սլովակների 73,5 տոկոսը մտադիր է չմասնակցել դրան։