Փեզեշքիանը շնորհակալություն է հայտնել Փաշինյանին և հայ ժողովրդին

Իրանի նախագահը Հայաստանի վարչապետի հետ հանդիպման ժամանակ շնորհակալություն է հայտնել Խամենեիի և վերջին հակամարտության մյուս զոհերի սպանությունից հետո Հայաստանի կառավարության ու ժողովրդի ցուցաբերած աջակցության և ցավակցությունների համար։

Նախագահ Փեզեշքիանը նշել է, որ ցավակցական ուղերձները վկայում են երկու հարևան պետությունների միջև առկա պատմական խորը կապերի և բարեկամության մասին։ Նա Իրան-Հայաստան հարաբերությունները որակել է որպես բարիդրացիության, փոխադարձ հարգանքի ու ընդհանուր շահերի վրա հիմնված փոխհարաբերություններ՝ շեշտելով, որ կողմերը հետևողականորեն զարգացրել են կառուցողական գործակցությունը տարբեր բնագավառներում։ Փեզեշքիանն ընդգծել է նաև, որ Թեհրանի և Երևանի միջև փոխհարաբերությունները պետք է առաջնորդվեն երկու երկրների անկախ կամքով ու զերծ մնան արտաքին միջամտությունից։ Նրա խոսքով՝ արտատարածաշրջանային ուժերի ներկայությունը հաճախ ոչ թե լուծում, այլ բարդացնում է տարածաշրջանի մարտահրավերները։ Վերահաստատելով Իրանի արտաքին քաղաքականության սկզբունքները՝ նախագահը կարևորել է բոլոր պետությունների տարածքային ամբողջականության ու ինքնիշխանության հարգումը և նշել, որ Թեհրանը նախապատվությունը տալիս է վեճերը դիվանագիտության ու երկխոսության միջոցով հարթելուն։

Վարչապետ Փաշինյանն իր հերթին ցավակցություն է հայտնել Իրանի ժողովրդին ու կառավարությանը՝ մտաբերելով նահատակ առաջնորդի հետ ունեցած իր հանդիպումները։ Նա վերահաստատել է, որ Հայաստանը հավատարիմ է Իրանի հետ բարեկամական հարաբերություններին և հայտարարել, որ Երևանը երբեք չի ներգրավվի որևէ նախաձեռնության մեջ, որը կարող է հակասել Իրանի ազգային շահերին կամ անվտանգությանը։ Նա նաև հավելել է, որ երկկողմ հարաբերությունները ներկայումս գտնվում են Հայաստանի անկախացումից ի վեր իրենց ամենաուժեղ մակարդակում։ Հիշեցնենք, որ Փաշինյանը նախորդ օրն աշխատանքային այցով մեկնել էր Իրան, որտեղ մասնակցել էր ԻԻՀ հանգուցյալ գերագույն առաջնորդ Ալի Խամենեիի հրաժեշտի պաշտոնական արարողությանը։