Եթե Հայաստանը ցանկանում է դառնալ Ադրբեջանի մաս, դա իր ընտրությունն է. ռուս քաղաքագետ

Ռուսաստանցի թյուրքագետ, քաղաքական գիտությունների դոկտոր Վլադիմիր Ավատկովը Երևանում անցկացվող «Հարավային Կովկասի էներգետիկ անվտանգություն․ Հայաստանի ընտրությունը» միջազգային գիտական-փորձագիտական համաժողովի շրջանակում մեկնաբանել է ադրբեջանական էներգակիրներով հայկական շուկան հեղեղելու հնարավորության հարցը։

«Այստեղ կա երկու հանգամանք․ եթե Հայաստանը ցանկանում է դառնալ Ադրբեջանի մաս, ապա, հավանաբար, դա Հայաստանի ընտրությունն է։ Ինչպես հայտնի է, Ռուսաստանը չի միջամտում Հայաստանի ներքին գործերին։ Սա հայ ժողովրդի և Հայաստանի ընտրությունն է։ Սակայն այստեղ կան ռիսկեր՝ թե՛ աշխարհաքաղաքական, թե՛ աշխարհառազմավարական, ուժերի հավասարակշռության և տարածաշրջանում փոխգործակցության փոփոխության առումով»։ Այս մասին այսօր՝ հուլիսի 4-ին, Երևանում լրագրողների հետ զրույցում հայտարարել է ռուսաստանցի թյուրքագետ, քաղաքական գիտությունների դոկտոր Վլադիմիր Ավատկովը։

Ռուսաստանցի փորձագետի դիտարկմամբ՝ առկա են նաև տնտեսական բնույթի ռիսկեր, քանի որ ակնհայտ է թուրքական տնտեսության՝ շատ բարդ իրավիճակում գտնվելու փաստը։

«Սակայն, միևնույն ժամանակ, թուրքական տնտեսությունը շատ ավելի մեծ է, քան հայկական տնտեսությունը, և ունի անհամեմատ ավելի մեծ հնարավորություններ։ Այս առումով Հայաստանի տնտեսության տեսանկյունից սահմանը բացելու և առհասարակ հաղորդակցությունների դեպքում ռիսկերը շատ մեծ են։ 

Բացի այդ, ըստ Ավատկովի, առկա է նաև պայմանագրային պարտավորությունների հարցը։

«Նույն Վրաստանը, որը նավթամթերք է ստանում Ադրբեջանից, դրանք ստանում է բավական վաղուց կնքված պայմանագրային պարտավորությունների շրջանակում․ երբ կար համապատասխան հնարավորություն, կառուցվեց Բաքվից Թուրքիա՝ Թբիլիսիով անցնող գազատարը։ Եվ դրա շրջանակում, իհարկե, Վրաստանը կարող էր և ստանում է համապատասխան ռեսուրսները այդ նավթատարով։ Ավելին, բենզինն էլ է գալիս Ադրբեջանից, և այն ամենը, ինչ կապված է դրա հետ։ Սակայն դա ամբողջությամբ և լիովին փոխարինել չհաջողվեց, և դա Վրաստանի համար այնքան էլ շահավետ չէ՝ համեմատած նախկին իրավիճակի հետ, երբ Ռուսաստանն ու Վրաստանը լավ հարաբերություններ ունեին, և Ռուսաստանը մեր վրացի գործընկերներին էներգակիրներ էր մատակարարում շատ ավելի ցածր գնով», - ասել է նա։