Mercedes-Benz-ի հազարավոր աշխատակիցներ գործադուլ են սկսել Գերմանիայում

Mercedes-Benz Group AG գերմանական ավտոարտադրողի հազարավոր աշխատակիցներ դուրս են եկել բողոքի ցույցերի՝ ծախսերի կրճատման նոր ծրագրի պատճառով, հաղորդել է SWR-ը։ Handelsblatt թերթն ավելի վաղ գրել էր, որ ընկերությունը Գերմանիայում իր 90 հազար աշխատակիցներին կթողնի առանց տարեկան պարգևավճարի։ Ղեկավարությունը նաև նախատեսում է առանց հավելավճարի ավելացնել աշխատանքային շաբաթվա տևողությունը։ Պարբերականի գնահատմամբ՝ խնայված գումարը կարող է կազմել ավելի քան տասը միլիոն եվրո։

«Ուրբաթ մբողջ Գերմանիայում Mercedes-ի հազարավոր աշխատակիցներ դուրս են եկել բողոքի ակցիաների՝ ընդդեմ ընկերության ծախսերի կրճատման քաղաքականության։ Դրանց մասնակցել է շուրջ 20 հազար աշխատակից», — նշվել է հրապարակման մեջ՝ հղում կատարելով IG Metall խոշորագույն արհմիությանը։ Իր հերթին, ընկերության ներկայացուցիչը հայտարարել է միայն տասը հազար բողոքողի մասին։ SWR-ի տեղեկություններով՝ Բադեն Վյուրթեմբերգ դաշնային երկրամասի Զինդելֆինգեն քաղաքում գտնվող ձեռնարկության աշխատակիցները պահանջել են ավտոկոնցեռնի տնօրենների խորհրդի նախագահ Օլա Կալենիուսի հրաժարականը։ 

Mercedes-Benz-ի արտադրական խորհրդի նախագահ Էրգուն Լյումալին դատապարտել է ղեկավարության մտադրությունը՝ աշխատանքային շաբաթվա տևողությունը 35-ից 40 ժամի հասցնելու վերաբերյալ, և ընդգծել, որ աշխատակիցները չեն կարող պատասխանատվություն կրել տնօրենների խորհրդի սխալ հաշվարկների համար։ Ապրիլին ընկերությունը հայտարարել էր, որ իր եռամսյակային զուտ շահույթը նախորդ տարվա նույն ժամանակահատվածի համեմատ նվազել է 15,5 տոկոսով՝ կազմելով 1,4 միլիարդ եվրո։