Ռուսաստանում բենզինի ճգնաժամը խորանում է․ Մոսկվան պատրաստվում է բենզին ներկրել Հնդկաստանից

Ռուսաստանում վառելիքի դեֆիցիտը շարունակում է խորանալ՝ ազդելով ինչպես քաղաքացիների առօրյայի, այնպես էլ գյուղատնտեսության և տրանսպորտի աշխատանքի վրա։ Reuters-ի փոխանցմամբ՝ իրավիճակը պայմանավորված է ուկրաինական անօդաչու թռչող սարքերի հարվածներով, որոնք վերջին ամիսներին թիրախավորել են Ռուսաստանի նավթավերամշակման գործարաններն ու նավթային պահեստները:

Գործակալության տվյալներով՝ հատկապես Ռուսաստանի հացահատիկ արտադրող շրջաններում ֆերմերները մտավախություն ունեն, որ վառելիքի պակասի պատճառով չեն հասցնի ժամանակին հավաքել բերքը։ Որոշ բնակավայրերում արդեն սահմանափակվել են բենզինի վաճառքները, իսկ վարորդները ստիպված են երկար հերթեր կանգնել լցակայաններում։

Սոցիալական ցանցերում լայն տարածում են գտել հրապարակումներ, որոնցում մարդիկ միմյանց տեղեկացնում են, թե որ բենզալցակայաններում դեռ վառելիք կա։ Տարածվել են նաև տեսանյութեր, որտեղ հերթերում սպասող վարորդների միջև վեճեր և ծեծկռտուքներ են տեղի ունենում։

Իրավիճակը ստիպել է ռուսական իշխանություններին նոր լուծումներ փնտրել։ Փոխվարչապետ Ալեքսանդր Նովակի խոսքով՝ կառավարությունը միջոցներ է ձեռնարկում շուկան կայունացնելու համար։

Ռուսաստանն արդեն սկսել է ծովային ճանապարհով բենզին ներկրել Հնդկաստանից։ Բացի այդ,Ղազախստանը  համաձայնել է հուլիս-օգոստոս ամիսներին Ռուսաստանին մատակարարել 50 հազար տոննա բենզին։

Ավելի վաղ Վլադիմիր Պուտինն էլ ընդունել էր, որ երկրում վառելիքի մատակարարման հետ կապված խնդիրներ կան և հայտարարել էր, որ հատկապես կարևոր է ապահովել գյուղատնտեսության ոլորտի անխափան վառելիքամատակարարումը, քանի որ դրանից է կախված բերքահավաքը։

Եթե ուկրաինական հարվածները շարունակվեն և վառելիքի պակասը երկարաձգվի, դա կարող է ավելի մեծ ազդեցություն ունենալ Ռուսաստանի տնտեսության և հասարակական տրամադրությունների վրա։