Անահիտ Ավանեսյանը կմեկնի Թուրքիա

ՀՀ վարչապետի որոշմամբ՝ Առողջապահության նախարար Անահիտ Ավանեսյանը 2026 թվականի հուլիսի 1-2-ը կգործուղվի Թուրքիայի Հանրապետություն (Ստամբուլ)։

Գործուղման նպատակն է մասնակցությունը «Երկրաշարժերի առողջապահական ազդեցության նվազեցմանն ուղղված առողջապահական համակարգերի պատրաստվածություն և արձագանքում» խորագրով նախարարական համաժողովին։ Որոշումը կայացվել է համաձայն «Կառավարության կառուցվածքի և գործունեության մասին» Հայաստանի Հանրապետության օրենքի 7-րդ հոդվածի 5-րդ մասի։

Նախարարի օրապահիկի ծախսերը կատարվելու են Հայաստանի Հանրապետության 2026 թվականի պետական բյուջեով ՀՀ առողջապահության նախարարությանը հատկացված միջոցների հաշվին: Միևնույն ժամանակ ի գիտություն է ընդունվել, որ Անահիտ Ավանեսյանի ճանապարհածախսը և գիշերավարձի ծախսերը հոգալու է հրավիրող կողմը՝ իր միջոցների հաշվին:

Ըստ հրամանագրի՝ ՀՀ առողջապահության նախարարը գործուղումից վերադառնալուց հետո եռօրյա ժամկետում պետք է ներկայացնի ուղևորության արդյունքների մասին հաշվետվությունը՝ համաձայն Հայաստանի Հանրապետության վարչապետի 2018 թվականի սեպտեմբերի 19-ի N 1230-Ն որոշմամբ սահմանված կարգի։