Ֆրանսիայում ծայրահեղ շոգի պատճառով մահվան դեպքերն ավելացել են

Ֆրանսիայում արձանագրված անոմալ շոգ եղանակը հանգեցրել է մահացության ցուցանիշների բարձրացման, ինչի պատճառով երկրի առողջապահության նախարար Ստեֆանի Ռիստը հայտարարել է Փարիզի և հարակից շրջանների բոլոր հիվանդանոցների համար արտակարգ գործողությունների հատուկ ծրագրերի գործարկման մասին, հայտնում է BBC-ն։

Միևնույն ժամանակ, Մարսել քաղաքում ավտոմեքենայի մեջ գտնվող 18 ամսական երեխա է մահացել: Սա Ֆրանսիայում արձանագրված միակ դեպքը չէ. չորեքշաբթի օրը մեքենայի սրահում կյանքից զրկվել էր նաև երեք տարեկան մի երեխա, իսկ երկուշաբթի օրը նմանօրինակ ողբերգական դեպք էր պատահել երկու փոքրահասակ երեխաների հետ հարավում գտնվող Կարպենտրա քաղաքում։ Շոգ եղանակի մեկնարկից ի վեր Ֆրանսիայի տարածքում ջրահեղձ է եղել 55 մարդ, որոնց երկու երրորդը լողացել է փրկարարների հսկողությունից դուրս գտնվող ջրային գոտիներում։ 

Կիրակի օրվանից մինչև հինգշաբթի ընկած ժամանակահատվածում Իսպանիայում բարձր ջերմաստիճանի հետևանքով կյանքից զրկվել է 327 քաղաքացի, թեև այնտեղ տապն արդեն սկսել է մեղմանալ։ Զուգահեռաբար, Շվեյցարիայի սառցադաշտերը հետազոտող մասնագետները նշել են, որ մինչև երկուշաբթի ձմռան ամիսներին կուտակված ողջ սառցաշերտը, ամենայն հավանականությամբ, կհալվի։ Շվեյցարիայում բարձր ջերմաստիճան սովորաբար դիտվում է օգոստոսին, սակայն մասնագետներն ահազանգում են, որ սառցադաշտերի հալման ներկա արագությունը հասել է 2022 թվականի ռեկորդային ցուցանիշներին։