Ռուսաստանի ավելի քան 50 շրջանում սահմանափակվել է բենզինի վաճառքը

Ռուսաստանում շարունակվում է վառելիքային ճգնաժամը․ բենզինի և դիզելային վառելիքի վաճառքի սահմանափակումներ են մտցվել նաև երկրի գլխավոր նավթարդյունահանող շրջաններից մեկում՝ Խանտի-Մանսիյսկի ինքնավար մարզում։ Այս մասին հայտնում է Говорит НеМосква-ն։

Ըստ աղբյուրի՝ «Գազպրոմնեֆտ»-ի բենզալցակայաններում մեկ հաճախորդին թույլատրվում է վաճառել առավելագույնը 40 լիտր բենզին և 80 լիտր դիզելային վառելիք։ Բացի այդ, վառելիքը կարելի է լցնել միայն մեքենայի բաքի մեջ և կանխավճարով։

Սահմանափակումների մասին հայտնել են նաև Տյումենի և Տոմսկի մարզերի բնակիչները։ Վերջինիս Ստրեժևոյ քաղաքում տեղական իշխանությունները պարզաբանել են, որ միջոցը նպատակ ունի կանխել վառելիքի զանգվածային տեղափոխումը այլ շրջաններ։

Հաղորդվում է, որ նմանատիպ սահմանափակումներ արդեն գործում են Ռուսաստանի ավելի քան 50 շրջաններում։

Լրատվամիջոցի տվյալներով՝ իրավիճակը պայմանավորված է ռուսական նավթավերամշակման գործարանների և նավթաբազաների վրա ուկրաինական անօդաչու թռչող սարքերի հարձակումների հետևանքով։ Reuters-ի փոխանցմամբ՝ մայիսին այդ հարվածների պատճառով Ռուսաստանի մի շարք խոշոր նավթային օբյեկտներ կրճատել կամ ժամանակավորապես դադարեցրել են աշխատանքը։