Ռուսաստանից սենսացիոն հայտարարություններ՝ ինչ է սպասվում Երևանին

Ռուսական պետական և խոշոր լրատվամիջոցները լայնորեն անդրադարձել են Հայաստանում հունիսի 7-ին կայացած ԱԺ ընտրությունների նախնական արդյունքներին՝ դրանք ներկայացնելով քաղաքական ու գործընթացային քննադատական դիտարկումներով։  Ռուսական աղբյուրներում նշվում է՝   ընտրարշավի ընթացքում և քվեարկության օրերին եղել են  ընդդիմադիր գործիչների ձերբակալություններ։ Այդ ֆոնը օգտագործվում է որպես փաստարկ, որ ընտրական մրցակցությունը եղել է ոչ հավասար պայմաններում։

 «РИА Новости»-ն և այլ աղբյուրներ մեջբերում են ռուս դիտորդների հայտարարությունները, ըստ որոնց՝ քվեարկության և հաշվարկի ընթացակարգերը բարդացված են, ինչի հետևանքով ընտրական հանձնաժողովների անդամները շփոթվել են՝ ձայների հաշվարկի և արձանագրությունների լրացման ընթացքում։

ՌԴ բարձրաստիճան պաշտոնյաների արձագանքները նույնպես չուշացան․

ՌԴ Պետդումայի պատգամավոր Կոնստանտին Զատուլինը նշել է․ «Ընտրությունները Հայաստանում կարող են արագացնել Երևանի շրջադարձը և Գյումրիի շուրջ վեճը»։

ՌԴ ԱԳՆ պաշտոնական ներկայացուցիչ Մարիա Զախարովան ասել է «Ակնհայտ է հայ հասարակության խնդրանքը ռուս-հայկական կապերի զարգացման և եվրասիական ինտեգրացիոն կառույցներում Հայաստանի հետագա գտնվելու վերաբերյալ»։

Ռուսաստանի անվտանգության խորհրդի քարտուղարի տեղակալ Դմիտրի Մեդվեդևը նշել է, որ ընտրությունները, որտեղ, ըստ նրա, փորձ է արվում «չեզոքացնել մրցակիցներին», դժվար է լիովին լեգիտիմ համարել։

 Ռուսաստանի Դաշնության նախագահի մամուլի քարտուղար Դմիտրի Պեսկովն էլ հայտարարել է․ « Կրեմլը ձեռնպահ է մնում Հայաստանում կայացած խորհրդարանական ընտրությունների պաշտոնական գնահատականից մինչև վերջնական արդյունքների հրապարակումը, սակայն արձանագրում է քվեարկության ընթացքում թույլ տրված խախտումների վերաբերյալ հաղորդումները »

Այսպիսով, ռուսական մամուլը ՀՀ ԱԺ հերթական ընտրությունների վերաբերյալ շեշտադրում է ոչ միայն արդյունքների ներկայացումը, այլև այն ընկալումը, որ ընտրական գործընթացը ուղեկցվել է համակարգային խնդիրներով և վիճարկվող լեգիտիմության շուրջ քննարկումներով, ինչը ձևավորում է նրանց հիմնական մեկնաբանությունների առանցքը։ Հավելենք՝  ռուսական մամուլում գերակշռում են քննադատական շեշտադրումները։