Կրեմլի պլանը ընդդեմ Նիկոլ Փաշինյանի. Reuters-ի աղմկահարույց հրապարակումը

 Ռուս պաշտոնյաները վերջին ամիսներին քննարկել են Ռուսաստանում բնակվող Հայաստանի քաղաքացիներին հայրենիք ուղարկելու ծրագիրը, որպեսզի նրանք խորհրդարանական ընտրություններում քվեարկեն գործող վարչապետ Նիկոլ Փաշինյանի մրցակիցների օգտին, գրում է Reuters-ը՝ հղում անելով չորս աղբյուրների։ Գործակալության զրուցակիցների խոսքով՝ ռուսական իշխանությունները 100 հազար ընտրողների տեղափոխման արժեքը գնահատել են մոտ 50 միլիոն դոլար։ Մայիսի կեսերին Կրեմլը ռուսական տարածաշրջաններին բաշխել է քվոտաներ՝ թե յուրաքանչյուրից քանի հայ պետք է ուղարկվի, և տեղական իշխանություններից պահանջել է զեկուցել նախապատրաստական աշխատանքների մասին։ 

Reuters-ի լրագրողներին չի հաջողվել պարզել՝ արդյոք այդ ծրագիրն իրականացվում է գործնականում, և արդյոք ընտրողների այդպիսի քանակը բավարար կլինի ընտրություններում հիմնական թեկնածուների միջև եղած տարբերությունը կրճատելու համար։ Մայիսին անցկացված հարցումները ցույց են տալիս, որ Նիկոլ Փաշինյանի «Քաղաքացիական պայմանագիր» կուսակցությունն առայժմ զբաղեցնում է առաջին տեղը՝ մոտ 30% արդյունքով, իսկ նրա մերձավոր մրցակից Սամվել Կարապետյանի «Ուժեղ Հայաստանը» մեծ տարբերությամբ ընթանում է երկրորդ տեղում՝ ունենալով մոտ 6%։ Հունիսի 7-ին Հայաստանում տեղի կունենան խորհրդարանական ընտրություններ, որոնցում առաջատարներից մեկի կարգավիճակով հանդես է գալիս գործող վարչապետ Նիկոլ Փաշինյանը։ Վերջին մի քանի տարիներին Հայաստանը սկսել է մերձենալ Եվրամիության հետ։

 Ընտրություններից երկու շաբաթ առաջ Փաշինյանին աջակցել է նաև Դոնալդ Թրամփը։ Ռուսաստանը Փաշինյանին մեղադրում է արևմտամետ կուրս որդեգրելու մեջ և պահանջում է ընտրություններին թույլ տալ գործարար Սամվել Կարապետյանին, ով Հայաստանում գտնվում է քննության տակ։ Մայիսի վերջին Ռուսաստանը սպառնացել է Հայաստանին, որ Երևանի՝ ԵՄ-ի հետ մերձեցման պատճառով կդադարեցնի նավթի և գազի մատակարարումները։ Դրան զուգահեռ, Ռոսսելխոզնադզորը մի քանի օրվա ընթացքում տարբեր պատրվակներով արգելել է Հայաստանից մի շարք ապրանքների՝ ծաղիկների, բանջարեղենի, ելակի և «Ջերմուկ» հանքային ջրի ներկրումը Ռուսաստան։

 Reuters-ի և The Insider-ի տվյալներով՝ 2025 թվականի հոկտեմբերին Կրեմլը ստեղծել է «Ռազմավարական համագործակցության և գործընկերության վարչություն» անվանումով կառույց, որը համակարգում է ազդեցության գործողությունները Հայաստանում։ Մասնավորապես, հայկական արշավներում ներգրավված է բոտերի ցանց՝ «Շտորմ-1516» անվանումով, որը հայտնի է Արևմուտքում ֆեյքեր տարածելով։ Այն կապում են ԳՀՎ-ի (Գլխավոր հետախուզական վարչություն) հետ։