Մոսկվան գործի անցավ. Ինչպես են փորձում ներսից «պայթեցնել» Հայաստանը

Հայաստանում սպասվող ընտրությունների նախաշեմին Մոսկվան անցել է կոշտ և բազմաշերտ ճնշումների մաքսիմալ ակտիվ փուլի: Սա դասական «մտրակի և բլիթի» քաղաքականություն է, որտեղ բլիթն արդեն իսպառ բացակայում է, իսկ մտրակը կիրառվում է թե՛ քաղաքական-դիվանագիտական, թե՛ տնտեսական մակարդակներում:

Ստորև ներկայացված է իրավիճակի համապարփակ վերլուծությունը, թե ինչպես է Ռուսաստանը փորձում ներքին դժգոհության ալիք բարձրացնել Հայաստանում։

Ռուսական կողմը փորձում է հայաստանյան հանրությանը կանգնեցնել կոշտ ընտրության առջև՝ «կա՛մ մենք, կա՛մ արևմուտքը»: Օգտագործելով «երկու հարսանիքում պարել չի ստացվի» ժողովրդական պատկերավոր արտահայտությունը՝ Մոսկվան փորձում է հանրության մեջ սերմանել վախ: Փաշինյանին «հակառուսական արշավի» մեջ մեղադրելը ուղղակի ազդակ է հայաստանյան ընդդիմադիր և դժգոհ զանգվածներին: Մոսկվան ընտրություններից առաջ բացահայտ ցույց է տալիս, որ գործող իշխանությունը չունի իր հավանությունը, ինչը տեղական պրոռուսական կամ ուղղակի դժգոհ ուժերին կոնսոլիդանալու և իշխանափոխության օրակարգ ձևավորելու ազդակ է տալիս: 

Եթե հայտարարությունները քաղաքական ֆոն են ստեղծում, ապա տնտեսական սահմանափակումները (օրինակ՝ ծաղիկների արտահանման արգելքը) այդ ֆոնի գործնական «մտրակներն» են: 

Ծաղիկների, իսկ ավելի վաղ նաև կոնյակի, կաթնամթերքի կամ լարսում հայկական բեռնատարների պարբերական «խցանումները» (իբրև թե սանիտարական խնդիրների պատճառով) ուղղակի հարված են հայաստանյան փոքր ու միջին բիզնեսին, ֆերմերներին ու արտահանողներին:

Մոսկվայի հաշվարկը պարզ է. երբ հազարավոր ֆերմերներ կամ գործարարներ կանգնեն սնանկացման եզրին, նրանք իրենց բողոքի սլաքն ուղղելու են ոչ թե Մոսկվայի, այլ Երևանի դեմ՝ մեղադրելով ՀՀ իշխանություններին «սխալ արտաքին քաղաքականության» և իրենց եկամուտները վտանգելու մեջ: Վերլուծելով իրավիճակը արձանագրենք, որ խորհդարանական ընտրություններից մոտ երկու շաբաթ առաջ Կրեմլը գործի դրեց ՀՀ իշխանություններին և հասարակության տարբեր շետերին ճնշելու կոշտ մեխանիզմը: Կարծում ենք պարզ է, որ մինչև ընտրությունները հասարակական բողոքի լայն ալիք բարձրացնելը այնքան էլ իրատեսական չէ, բայց...: Հաշվի առնելով ընդդիմության սակավամարդ և ոչ այնքն տպավորիչ քարոզարշավը կարելի է ենթադրել, որ Ռուսաստանը և ռուսամետ ընդդիմությունը շեշտը դնելու է հետընտրական զարգացումների վրա, որի հիմքում լինելու է մեր ռազմավարական դաշնակցի կողմից կիրառված սահմանափակումների արդյունքում ձևավորված սոցիալ-տնտեսական դժգոհությունը:

Դավիթ Ջալալյան