Զելենսկին պատժամիջոցներ կկիրառի Իսրայելի դեմ

Ուկրաինայի նախագահ Վլադիմիր Զելենսկին սպառնացել է պատժամիջոցներ սահմանել Իսրայելի դեմ՝ Դոնբասից հացահատիկով բեռի ընդունման համար։


Խոսքը վերաբերում է Իսրայելի նավահանգստի կողմից Դոնբասից ուղարկված հացահատիկով բեռի ընդունմանը։ Զելենսկին նշել է, որ դա չի կարող դիտարկվել որպես մասնավոր բիզնես, քանի որ Իսրայելի իշխանությունները պարտավոր են տեղեկացված լինել երկրի նավահանգիստներ ժամանող նավերի և դրանց բեռների մասին։

«Դա չի կարող լինել մասնավոր բիզնես։ Իսրայելի իշխանությունները չեն կարող չիմանալ, թե որ նավերն են և ինչ բեռով ժամանում երկրի նավահանգիստներ»,- հայտարարել է նա։

Ըստ նախագահի՝ մշակվող պատժամիջոցների փաթեթը թիրախավորելու է այն փոխադրողներին, ընկերություններին և անհատներին, որոնք ներգրավված են այդ մատակարարումներում։

«Ուկրաինան, մեր հետախուզական ծառայություններից ստացված տեղեկատվության հիման վրա, պատրաստում է համապատասխան պատժամիջոցների փաթեթ, որը կընդգրկի ինչպես նրանց, ովքեր անմիջապես տեղափոխում են այդ հացահատիկը, այնպես էլ այն ֆիզիկական և իրավաբանական անձանց, որոնք փորձում են վաստակել նման հանցավոր սխեմայի վրա։ Մենք նաև դա կհամաձայնեցնենք եվրոպական գործընկերների հետ, որպեսզի համապատասխան անձինք ներառվեն եվրոպական պատժամիջոցների ռեժիմներում»,- գրել է Զելենսկին։