Առողջապահության նախարարությունը մանրամասներ է ներկայացրել Բյուրեղավանի դեպքից

Բյուրեղավան քաղաքում վերջին օրերին բազմաթիվ քաղաքացիներ են դիմել շտապօգնության ծառայություն՝ սրտխառնոց, փորլուծություն, փսխում, ջերմության բարձրացում գանգատներով: Մի քանի ժամում նույն սիմպտոմատիկայով կանչերի թիվը հասել է 30-ի: Համայնքապետարանը հայտարարություն է տարածել՝ հորդորելով կա՛մ չօգտվել ջրից, կա՛մ օգտագործել եռացրած ջուր:

Բյուրեղավանում ստեղծված իրավիճակի վերաբերյալ 1lurer.am-ին առողջապահության նախարարությունից: Գերատեսչությունից հայտնեցին, որ հոսպիտալացված քաղաքացիների թիվն այս պահին 5-ն է:

«Ունեցել ենք շտապօգնության կանչեր՝ ընդհանուր թուլություն, փսխում, ջերմություն գանգատներով: Անհապաղ ՀՎԿԱԿ-ի մեր մասնագետների կողմից իրականացվել է համաճարակաբանական հետազոտություն և նմուշառում:

Գործընթացը ընթացքի մեջ է, արդյունքների մասին կհայտնենք:Ծանր դեպքեր չունենք: Հոսպիտալացվել է 5 քաղաքացի բավարար և միջին առողջական վիճակով»,- հայտնում են առողջապահության նախարարությունից:

Հիշեցնենք` ավելի վաղ հայտնել էինք` Auroranews.am-ը բազմաթիվ ահազանգեր է ստացել Կոտայքի մարզի Բյուրեղավան քաղաքից։

Բնակիչների խոսքով խմելու ջրի հետ կապված լուրջ խնդիր կա, ըստ տեղի բնակիչների՝ կոյուղատար խողովակները պայթել են, որն էլ պատճառ է հանդիսացել խմելու ջրի ախտոտմանը։