Լավ լուր ոստիկանության ծառայողների համար` կապված հիփոթեքային վարկերի հետ

Կառավարությունը հավանություն է տվել ՆԳՆ նախաձեռնությանը, որով Ոստիկանության ծառայողներին հնարավորություն կտրվի արտոնյալ պայմաններով հիփոթեքային վարկավորմամբ բնակարան ձեռք բերել կամ տուն կառուցել։

Գործադիրը հավանության է արժանացրել Ներքին գործերի նախարարության օրենսդրական նախագիծը, որի համաձայն Ոստիկանության ծառայողները կարող են օգտվել բնակարանային ապահովման պետական նպատակային ծրագրերից։ Նախաձեռնության հիմնական նպատակը Ոստիկանությունում ծառայության գրավչության բարձրացումն է, սոցիալական լրացուցիչ երաշխիքների տրամադրումը և աշխատակիցների ֆինանսական բեռի թեթևացումը։

Այս նոր կարգավորումները տարածվելու են համակարգի բոլոր ծառայողների վրա։ Ծրագրից օգտվելու կոնկրետ կարգն ու պայմանները կսահմանվեն Կառավարության որոշմամբ, որտեղ կնախատեսվեն առաջնահերթություններ՝ հիմնվելով ծառայության վայրի, սոցիալական դրության և այլ գործոնների վրա։

Ներկայումս, կոռուպցիոն ռիսկերից ու շահերի բախումից խուսափելու համար, Ոստիկանության տարածքային ստորաբաժանումներում նշանակումներն արվում են այնպես, որ անձը ծառայությունն իրականացնի իր բնակավայրից դուրս, ինչը հանգեցնում է կեցության խնդիրների։ Աջակցության այս ծրագրերի ներդրմամբ նախատեսվում է լուծել ծառայողների բնակարանային հարցերը՝ միաժամանակ նպաստելով աշխատանքի արդյունավետության աճին։