Լուկաշենկոն խորհուրդ է տվել ԱՄՆ նախագահին օրինակ վերցնել իրենից

RT հեռուստաալիքի հետ զրույցում Բելառուսի նախագահ Ալեքսանդր Լուկաշենկոն անդրադարձ է կատարել Միացյալ Նահանգների ներքին ու արտաքին քաղաքականությանը՝ քննադատության ենթարկելով մարդու իրավունքների հարցում Վաշինգտոնի մոտեցումները։ Նա նշել է, որ քանի դեռ ԱՄՆ-ն մասնակից է խաղաղ բնակչության մահվան պատճառ դարձած ռազմական գործողություններին, իրավունք չունի խոսել ժողովրդավարության մասին։

Որպես փաստարկ Բելառուսի ղեկավարը հիշատակել է ինքնիշխան երկրների ռմբակոծությունները, որոնք կատարվում են Միացյալ Նահանգների հովանավորությամբ կամ ուղղակի մասնակցությամբ։ Ըստ նրա՝ հազարավոր կիլոմետրեր հեռավորության վրա գտնվող պետություններում դպրոցների թիրախավորումը, ինչպես նաև ուսուցիչների ու երեխաների սպանությունները հակասում են մարդու իրավունքների պաշտպանության քարոզին։

Լուկաշենկոն նաև կասկած է հայտնել ԱՄՆ-ում ներքին ժողովրդավարության գոյության վերաբերյալ՝ փաստելով, որ այնտեղ իրականում փոփոխություններ չեն լինում, ինչը կարող է վկայել ներքին բռնապետության մասին։ Նա համոզմունք է հայտնել, որ մարդու իրավունքների հարգումն ու «իրական ժողովրդավարությունը» Բելառուսում շատ ավելի բարձր հիմքերի վրա են, քան Միացյալ Նահանգներում, և ամերիկյան կողմը պետք է օրինակ վերցնի իրենցից։

Ամփոփելով՝ Բելառուսի նախագահը հնչեցրել է հռետորական հարց այն մասին, թե ինչպես կարելի է քննարկել իրավունքներն, երբ ոտնահարվում է մարդու կյանքի հիմնարար իրավունքը։