Իրանի ԱԳ նախարարի կոշտ քննադատությունը՝ ԱՄՆ-ի հասցեին

Իրանի իսլամական հանրապետության համար ընդունելի չէ Ամերիկայի Միացյալ Նահանգների հետ ժամանակավոր հրադադարի հաստատման որևէ տարբերակ։ Այս դիրքորոշումը Անթալիայի դիվանագիտական ֆորումի ընթացքում հայտնել է Իրանի արտաքին գործերի նախարարի տեղակալ Սայիդ Խաթիբզադեն։

Ըստ պաշտոնյայի՝ կարճաժամկետ պայմանավորվածությունները դիվանագիտական ռեսուրսների անարդյունավետ վատնում են և հանգեցնում են ռազմական գործողությունների վերսկսմանը, ինչը Թեհրանի համար անթույլատրելի է։

Խոսելով տարածաշրջանային իրավիճակի մասին՝ իրանցի պաշտոնյան ընդգծել է, որ միջնորդների մասնակցությամբ ընթացող շփումների առանցքային նպատակը խնդրի հիմնարար լուծումն է։ Խաթիբզադեն կատարվածը բնորոշել է որպես ԱՄՆ-ի և Իսրայելի կողմից իրականացվող ագրեսիա, որը վնասում է Իրանի ու ամբողջ տարածաշրջանի տնտեսական շահերին։ Նա հավելել է, որ ստեղծված կացության պատասխանատուն Վաշինգտոնն է։

Հարկ է նշել, որ փետրվարի 28-ին ԱՄՆ-ի և Իսրայելի նախաձեռնած ռազմական գործողություններից հետո, որոնց թիրախում էին հայտնվել Թեհրանն ու այլ խոշոր քաղաքներ, Իսլամական հեղափոխության պահապանների կորպուսը պատասխան հարվածներ էր հասցրել Իսրայելին և արաբական երկրներում գտնվող ամերիկյան օբյեկտներին։ Ապրիլի 11-ին Իսլամաբադում Իրանի խորհրդարանի խոսնակ Մոհամմադ Բաղեր Ղալիբաֆի և ԱՄՆ փոխնախագահ Ջեյ Դի Վենսի միջև տեղի ունեցած բանակցությունները արդյունք չեն տվել կողմերի միջև առկա խորը տարաձայնությունների պատճառով։