Փեզեշքիանը նշել է ԱՄՆ-ի հետ համաձայնության հասնելու ամենամեծ խոչընդոտը

Իրանի նախագահ Մասուդ Փեզեշքիանը Ռուսաստանի առաջնորդ Վլադիմիր Պուտինի հետ հեռախոսազրույցում հայտարարել է, որ Թեհրանը պատրաստ է Միացյալ Նահանգների հետ ստորագրել արդարացի և հավասարակշռված փաստաթուղթ։

Իրանի նախագահի համոզմամբ՝ նմանատիպ համաձայնագրի կնքումը կարող է Մերձավոր Արևելքում կայուն անվտանգության և տևական խաղաղության հաստատման երաշխիք հանդիսանալ։ Ինչպես տեղեկացնում է Իրանի նախագահի մամուլի ծառայությունը, բանակցային հարցերում Թեհրանի պետական առաջնահերթությունները մնում են անփոփոխ։ Մասուդ Փեզեշքիանն ընդգծել է, որ Իրանի ժողովրդի իրավունքների հարգումն ու ազգային շահերի պաշտպանությունը «կարմիր գծեր» են, իսկ երկխոսությունը պետք է հիմնվի կողմերի շահերի փոխադարձ հաշվառման վրա։

Ռուսաստանի նախագահի հետ քննարկման ընթացքում անդրադարձ է կատարվել նաև տարածաշրջանում իրավիճակի կայունացման անհրաժեշտությանը։ Իրանական կողմը պարբերաբար հանդես է գալիս միջազգային հարթակներում լարվածությունը նվազեցնող նախաձեռնություններով՝ միաժամանակ շեշտելով սեփական ինքնիշխանության պահպանման կարևորությունը։ Նման հայտարարություն է հնչել միջազգային դիվանագիտական ակտիվության պայմաններում, երբ կողմերը փորձում են գտնել առկա հակասությունների հաղթահարման ուղիներ։

Զրույցի ընթացքում Փեզեշքիանը Պուտինին պատմել է Միացյալ Նահանգների հետ բանակցությունների շուրջ ստեղծված իրավիճակի մասին՝ նշելով, որ համաձայնության հասնելու ամենամեծ խոչընդոտը «ԱՄՆ-ի կրկնակի չափանիշներն» են։