Իրանի խորհրդարանի նախագահը պատասխանել է Թրամփի սպառնալիքներին

Իրանի խորհրդարանի նախագահ Մոհամմադ-Բաղեր Ղալիբաֆը, անդրադառնալով ԱՄՆ նախագահ Դոնալդ Թրամփի վերջին հայտարարություններին և սպառնալիքներին` ներկայացրել է Թեհրանի դիրքորոշումը Վաշինգտոնի հետ հարաբերությունների վերաբերյալ։

Իրանի օրենսդիր մարմնի ղեկավարն ընդգծել է, որ Իսլամական Հանրապետությունը որդեգրել է հայելային գործողությունների մարտավարություն։ Ըստ պաշտոնյայի՝ իրանական կողմի պատասխանն անմիջականորեն պայմանավորված կլինի Միացյալ Նահանգների որդեգրած վարքագծով։

Ղալիբաֆը հայտարարել է, որ եթե ամերիկյան կողմը նախապատվությունը տա էսկալացիային կամ ռազմական գործողություններին, ապա Իրանը կդիմի նույնանման քայլերի։ Միաժամանակ խորհրդարանի խոսնակը շեշտել է, որ տրամաբանական մոտեցումների և երկխոսության դեպքում Թեհրանը պատրաստ է առաջնորդվել բացառապես կառուցողական սկզբունքներով և փոխադարձ տրամաբանությամբ։

Խոսելով Սպիտակ տան ղեկավարի սպառնալիքների մասին՝ Իրանի խորհրդարանի նախագահը նշել է, որ նման հռետորաբանությունը չի կարող ազդեցություն ունենալ երկրի ներքին կայունության կամ ժողովրդի կամքի վրա։ Նա հավելել է, որ ճնշում գործադրելու փորձերը չեն ծառայի իրենց նպատակին և չեն փոխի Իրանի ռազմավարական ուղղությունը։