Մակրոնը Փեզեշքիանի հետ հեռախոսազրույցից հետո գրառում է արել

Ֆրանսիայի նախագահ Էմանուել Մակրոնը հեռախոսազրույց է ունեցել Իրանի նախագահ Մասուդ Փեզեշքիանի հետ: Զրուցակիցներն անդրադարձել են տարածաշրջանային կայունությանն առնչվող հարցերի լայն շրջանակի:

Ֆրանսիայի առաջնորդը Թեհրանին հորդորել է կիրառել Իսլամաբադում մեկնարկած բանակցային գործընթացը՝ տևական դեէսկալացիայի հասնելու և անվտանգության երաշխիքներով համաձայնագիր կնքելու նպատակով: Բանակցությունների ընթացքում առանցքային նշանակություն է տրվել Հորմուզի նեղուցում նավագնացության ազատության վերականգնմանը: Մակրոնն ընդգծել է ջրային ուղիների անվտանգության կարևորությունը և հայտնել Փարիզի պատրաստակամությունը՝ ներդրում ունենալ այդ գործընթացում: Ըստ նրա՝ միջազգային առևտրային ուղիների անխափան աշխատանքը պետք է երաշխավորվի սեղմ ժամկետներում:

Կողմերն առանձնահատուկ ուշադրություն են դարձրել Լիբանանում տիրող իրավիճակին և հրադադարի ռեժիմի պահպանմանը: Էմանուել Մակրոնը շեշտել է, որ Ֆրանսիան սատարում է Լիբանանի օրինական իշխանություններին՝ որպես երկրի սուվերենությունն ապահովող և պետության ապագայի վերաբերյալ որոշումներ կայացնող միակ լեգիտիմ կառույցի: