Ռուսաստանը գիշերը հարվածել է Ուկրաինայի մի շարք շրջանների․ կա զոհ և վիրավորներ

Ռուսական բանակը օգոստոսի 27-ի գիշերը հարվածներ է հասցրել Ուկրաինայի մի շարք շրջանների, այդ թվում՝ Կիևին, Զապորոժիեին, Կրիվոյ Ռոգին, Խարկովին, ինչպես նաև Սումիի և Պոլտավայի մարզերին։ Տեղական իշխանությունների տվյալներով՝ մեկ մարդ զոհվել է, կան վիրավորներ։

Սումիի մարզի Ռոմնի համայնքում բնակելի տան ուղղությամբ հարվածի հետևանքով զոհվել է 66-ամյա կին։ Մարզային ռազմական վարչակազմի ղեկավար Օլեգ Գրիգորովի խոսքով՝ շրջանի ուղղությամբ նախնական տվյալներով արձակվել է ինը անօդաչու։ Դրանց մի մասը ոչնչացվել է, սակայն գրանցվել են հարվածներ քաղաքացիական ենթակառուցվածքներին։ Չորս մարդ դիմել է բժշկական օգնության։

Զապորոժիեում հարվածի հետևանքով վիրավորվել է երեք մարդ՝ երկու տղամարդ և մեկ կին։ Վնասվել են ավտոմեքենա և մի քանի շինություններ, հրդեհ է բռնկվել։

Կրիվոյ Ռոգում հրթիռային հարվածի թիրախ է դարձել արդյունաբերական ձեռնարկություն։ Քաղաքային իշխանությունների տվյալներով՝ երկու մարդ վիրավորվել է, նրանց վիճակը ծանր չէ։

Կիևում հրթիռների կամ անօդաչուների բեկորների անկում է գրանցվել երկու վայրում՝ Պոդոլսկի շրջանում բնակելի շենքի բակում և Շևչենկովսկի շրջանում՝ ուսումնական հաստատության տարածքում։ Մինչ այդ քաղաքում օդային տագնապ էր հայտարարվել բալիստիկ հրթիռի և ԱԹՍ-ների սպառնալիքի պատճառով։

Խարկովում անօդաչուն հարվածել է բնակելի շենքի չորրորդ հարկի պատշգամբին։ Տեղական իշխանությունների հաղորդմամբ՝ 30-ամյա տղամարդու մոտ սուր սթրեսային արձագանք է արձանագրվել։