Պետդումայում մեկնաբանել են Telegram-ի սահմանափակումները

Ռուսաստանում Telegram մեսենջերի աշխատանքի հնարավոր սահմանափակումները պայմանավորված են նրանով, որ ընկերությունը, ըստ իշխանությունների, ամբողջությամբ չի կատարում երկրի օրենսդրության պահանջները։ Այդ մասին հայտնել է ՌԴ Պետդումայի պատգամավոր Անդրեյ Սվինցովը՝ «Осторожно, новости»-ին տված մեկնաբանությունում։

Պատգամավորի խոսքով՝ Telegram-ը համագործակցում է «Ռոսկոմնադզոր»-ի հետ, սակայն դա անում է ոչ բավարար մակարդակով։ Նա նշել է, որ եթե մեսենջերը ցանկանում է շարունակել գործունեությունը Ռուսաստանում և ստանալ զգալի եկամուտներ, ապա պետք է լիարժեքորեն ենթարկվի ազգային օրենսդրությանը։ Սվինցովը նաև ընդգծել է, որ ընկերությունը պետք է ֆիզիկապես ներկայացված լինի երկրում և վճարի հարկեր, սակայն, նրա գնահատմամբ, այդ գումարները ներկայումս չեն արտացոլվում պետական բյուջեում։

Միևնույն ժամանակ ՌԴ իշխանությունները սկսել են Telegram-ի աշխատանքի սահմանափակման գործընթացը։ ՌԲԿ-ի փոխանցմամբ՝ տեղեկատվությունը հաստատել են IT ոլորտի աղբյուրներից մեկը և երկու աղբյուր՝ ոլորտային գերատեսչություններից։ Նրանց տվյալներով՝ «Ռոսկոմնադզոր»-ը կարող է արդեն այսօր ձեռնարկել մեսենջերի աշխատանքի մասնակի սահմանափակման քայլեր։

Աղբյուրներից մեկի պնդմամբ՝ Telegram-ի աշխատանքի դանդաղեցումը փաստացի արդեն սկսվել է։ Պաշտոնական մարմինները առայժմ չեն ներկայացրել մանրամասներ սահմանափակումների ծավալի և ժամկետների վերաբերյալ։