ՀՀ-ում ԱՄՆ դեսպանատունը հայտարարություն է տարածել
Ամերիկայի Միացյալ Նահանգների կառավարությունն ու Հայաստանի Հանրապետության կառավարությունը ավարտել են միջուկային էներգիայի խաղաղ օգտագործման ոլորտում համագործակցության համաձայնագրի շուրջ բանակցությունները: Այդ մասին նշված է Հայաստանում ԱՄՆ դեսպանության հայտարարության մեջ:
«Այդ բանակցությունների ավարտը կարևոր քայլ է քաղաքացիական միջուկային էներգետիկայի ոլորտում երկկողմ համագործակցության խորացման նպատակին հասնելու ճանապարհին՝ որպես Ամերիկայի Միացյալ Նահանգների կառավարության և Հայաստանի Հանրապետության կառավարության միջև էներգետիկ անվտանգության գործընկերության վերաբերյալ Փոխըմբռնման հուշագրի առանցքային տարր, որը ստորագրվել է 2025 թվականի օգոստոսի 8-ին Վաշինգտոնում:
Այս համաձայնագիրը կընդլայնի երկկողմ համագործակցությունն էներգետիկ անվտանգության ոլորտում, կամրապնդի երկու երկրի միջև տևական դիվանագիտական և տնտեսական հարաբերությունները և կապահովի համապարփակ իրավական հիմք միջուկային էներգետիկայի ոլորտում համագործակցության համար»,- ասված է հաղորդագրության մեջ:
Նշվում է, որ Վաշինգտոնն ու Երևանը հույս ունեն առաջիկա տարիներին զարգացնել ամուր, փոխշահավետ գործընկերություն միջուկային էներգետիկայի ոլորտում:
