Փեզեշքիանը քննադատական հայտարարությամբ է հանդես եկել

Իրանի նախագահ Մասուդ Փեզեշքիանը քննադատական հայտարարությամբ է հանդես եկել երկրի տեղեկատվական դաշտում գործող պետական և մերձիշխանական մեդիայի գործունեության վերաբերյալ՝ անդրադառնալով դրանց բովանդակության որակին և ուղղվածությանը։

Նրա խոսքով՝  հեռուստաալիքներն ու լրատվամիջոցները պետք է հրաժարվեն անիմաստ խոսակցություններից և ավելի մեծ ուշադրություն դարձնեն հասարակության իրական խնդիրներին։ Նախագահը նշել է, որ տեղեկատվական հարթակների հիմնական նպատակը պետք է լինի հասարակության ներգրավվածության և պետական կառույցների հետ համագործակցության փաստերի լուսաբանումը։

Փեզեշքիանն ընդգծել է, որ մեդիան կարող է կարևոր դեր ունենալ՝ ցույց տալու համար, թե ինչպես է ժողովուրդը աջակցում կառավարությանը և մասնակցում երկրի սոցիալական ու տնտեսական գործընթացներին։ Նրա գնահատմամբ՝ նման բովանդակությունը կարող է ավելի արդյունավետ լինել, քան ձևական կամ դատարկ հաղորդումները։

Իրանի նախագահի հայտարարությունը հնչել է ներքին տեղեկատվական քաղաքականության քննարկման համատեքստում և ուղղված է պետական հաղորդակցման մեխանիզմների վերանայմանը՝ ավելի նպատակային և գործնական մոտեցում ապահովելու համար։