Թրամփն ու խաղաղության խորհրդի առաջին նիստը. ովքե՞ր են մասնակցելու
Ամերիկայի Միացյալ Նահանգների նախագահ Դոնալդ Թրամփը հրավիրում է իր ստեղծած խաղաղության խորհրդի առաջին նիստը: Այն պետք է կայանա արդեն փետրվարի 19-ին Վաշինգտոնում։ Axios պարբերական տվյալներով՝ ԱՄՆ վարչակազմը ցանկանում է այդ հանդիպումն օգտագործել Գազայում հրադադարի մասին համաձայնագրի երկրորդ փուլն իրականացնելու և անկլավի վերականգնման համար միջոցներ հայթայթելու համար:
«Դա կլինի խաղաղության խորհրդի առաջին նիստը եւ Գազայի վերականգնման համար միջոցներ հայթայթելու համաժողովը», - պատմել է անանուն ամերիկացի պաշտոնյան: Խաղաղության խորհրդի նիստը նախատեսվում է անցկացնել Խաղաղության ինստիտուտում, որը Թրամփը վերջերս վերանվանեց իր պատվին:
«Առայժմ ոչինչ չի հաստատվել, սակայն վարչակազմը պլանավորում է դա եւ սկսել է ստուգել, թե որ առաջնորդները կկարողանան ներկա գտնվել», – նշել է զրուցակիցներից մեկը: Թրամփի խաղաղության խորհուրդի մասին սա է հայտնի: Հունվարի 22-ին Դավոսի համաշխարհային տնտեսական ֆորումի շրջանակներում ԱՄՆ նախագահ Դոնալդ Թրամփը պաշտոնապես հայտարարեց «խաղաղության խորհրդի» գործունեության մեկնարկի մասին, որը նա ստեղծել է:
Այժմ այդ խորհուրդն ունի 27 անդամ, իսկ այն գլխավորում Է Թրամփը։ Ի դեպ, նա այդ պաշտոնում կլինի նաև նախագահական ժամկետի ավարտից հետո, գրում էին ԶԼՄ-ները։ Ամերիկյան առաջնորդի ստեղծած կառույցը զբաղվելու է, այդ թվում, Գազայի հարցով։
Հարկ է նշել, որ Վաշինգտոնի արևմտյան գործընկերների մեծ մասը մերժել է Թրամփի խաղաղության խորհրդին միանալու հրավերը: Մասամբ այն պատճառով, որ նրա կանոնադրությունը լայն լիազորություններ է տալիս Խորհրդին, իսկ Թրամփը վետոյի բացառիկ իրավունք ունի նրա որոշումների նկատմամբ։
Ի դեպ, խաղաղության Խորհրդին անդամակցելու հրավեր, ի թիվս այլոց, ստացել են Ռուսաստանը և նրա դաշնակից Բելառուսը։ Ուկրաինան նույնպես ստացել է համապատասխան հրավեր։ Նախագահ Վլադիմիր Զելենսկին ասել է, որ չի պատկերացնում, թե ինչպես կարող է Ուկրաինան լինել Թրամփի «խաղաղության խորհրդում», որտեղ ներկա կլինի նաև ՌԴ-ն:
