Պղնձաձուլարան կառուցելը մեր օրակարգից երբեք դուրս չի գալիս. էկոնոմիկայի նախարար

Պղնձաձուլարան կառուցելը մեր օրակարգից երբեք դուրս չի գալիս, և մենք մեր բոլոր՝ և՛ լոկալ, և՛ դրսի գործընկերների, արտադրողների, ոլորտում փորձ ունեցող գործընկերների հետ շարունակական աշխատանքի մեջ ենք, որպեսզի արժեշղթան կարողանանք երկարացնել: Այս մասին տարեկան ամփոփիչ ասուլիսի ժամանակ ասել է ՀՀ էկոնոմիկայի նախարար Գևորգ Պապոյանը:

«Զանգեզուրի պղնձամոլիբդենային կոմբինատը որոշակի հարցադրումներ այդ մասով անում է, այսինքն՝ պղնձաձուլարանի բացումը նաև կապում են նոր հանքավայրի բացման հետ, այսինքն՝ իրենք նշում են, որ ծավալները պետք է ավելանան: Բայց մենք կարծում ենք, որ նույնիսկ առկա ծավալները պետք է որ բավարար լինեն, որպեսզի կարողանանք ավելի երկար արժեշղթա ունենալ: Սա մեր կարծիքն է, և աշխատանքն այս ուղությամբ շարունակվում է»,- ասել է նախարարը:

Պապոյանը անդրադարձել է նաև հետևյալին․ «Հիմա երկու ապրանք կա, քննարկում ենք, բանակցում ենք Ադրբեջանի հետ, որպեսզի դրանց ներմուծման հնարավորությունն էլ բացվի: Կլինի, կասենք՝ որ ապրանքների մասին է խոսքը»:

«Բիզնեսմենը մեզ ասում է, ենթադրենք, ուզում ենք այս ապրանքը բերել: Մենք սկսում ենք խոսել գործընկերների հետ, ստանում ենք համաձայնություն, հաստատում ենք, ասում ենք՝ այս ապրանքն էլ կարող ենք բերել»,- ասել է նախարարը՝ ընդգծելով, որ երբ վերջնական հաստատում լինի, նոր կասեն, թե ինչ ապրանքների մասին է խոսքը, որպեսզի լրացուցիչ սպասում և բանակցություններում ճնշում չգործադրվի կողմերի վրա: