Մենք միշտ կբանակցենք ուժի դիրքերից․ ԱՄՆ պետքարտուղար
ԱՄՆ վարչակազմը գիտակցում է, որ Ռուսաստանի, ԱՄՆ-ի և, հնարավոր է, այլ երկրների միջև միջուկային զենքի վերահսկման նոր համաձայնագրերի կնքումը կպահանջի երկարատև բանակցություններ։ ԱՄՆ պետքարտուղար Մարկո Ռուբիոն այս մասին հայտարարել է Պետդեպարտամենտի կայքում հրապարակված հայտարարության մեջ։
«Մենք միշտ կբանակցենք ուժի դիրքերից», - ասել է Ռուբիոն՝ ընդգծելով, որ ԱՄՆ-ն չի մտադիրվում համաձայնել այնպիսի պայմանների, որոնք կարող են խաթարել իր անվտանգությունը և կշարունակի արդիականացնել իր միջուկային ուժերը՝ միաժամանակ հայտարարելով միջուկային զենքի քանակը կրճատելու իր հետաքրքրության մասին։
Պետքարտուղարի խոսքով՝ ԱՄՆ-ի և Ռուսաստանի միջև երկկողմ համաձայնագրերի վրա հիմնված նախկին զենքի վերահսկման համակարգը այլևս հարմար չէ ներկայիս իրավիճակի համար, քանի որ Չինաստանը վերջին տարիներին զգալիորեն մեծացրել է իր միջուկային ներուժը։ Այս փաստը, Վաշինգտոնի կարծիքով, պահանջում է ռազմավարական կայունության նոր մոտեցում, որը հաշվի է առնում Չինաստանի հնարավորությունները։
«Չինաստանի Ժողովրդական Հանրապետության կողմից իր միջուկային զինանոցի արագ և անթափանց կուտակումը New START-ի ուժի մեջ մտնելուց ի վեր հնացրել է ԱՄՆ-ի և Ռուսաստանի միջև երկկողմ համաձայնագրերի վրա հիմնված սպառազինությունների վերահսկման նախկին մոդելը։ 2020 թվականից ի վեր Չինաստանը իր միջուկային զինանոցը 200-ից մի փոքր ավելիից մեծացրել է մինչև 600-ից ավելի մարտագլխիկ և 2030 թվականին այն 1000-ից ավելի ունենալու ուղղությամբ է։ Ցանկացած սպառազինությունների վերահսկման համաձայնագիր, որը չի հաշվի առնի Չինաստանի կողմից Ռուսաստանի կողմից աջակցվող մարտագլխիկների կուտակումը, անխուսափելիորեն ԱՄՆ-ին և մեր դաշնակիցներին պակաս անվտանգ կդարձնի», - նշել է Ռուբիոն։
Ռուբիոն կարծում է, որ սպառազինությունների վերահսկումը չպետք է սահմանափակվի ԱՄՆ-ի և Ռուսաստանի միջև համաձայնագրերով։ Նա նշել է, որ այլ երկրներ, այդ թվում՝ Չինաստանը, նույնպես պատասխանատվություն են կրում ռազմավարական կայունության ապահովման համար։
