Հաշտարարության ինստիտուտի թվայնացման արդյունքում արձանագրվել են դրական ցուցանիշներ․ Գալյան
Հաշտարարության ինստիտուտի թվայնացման արդյունքում Հայաստանում արձանագրվել են դրական ցուցանիշներ։ Այս մասին մամուլի ասուլիսի ժամանակ ասել է Արդարադատության նախարար Սրբուհի Գալյանը։
Նախարարի խոսքով՝ ընտանեկան որոշ գործերի շրջանակում գործող պարտադիր հաշտարարության համակարգը ունի համապատասխան թվային հարթակ, որի միջոցով հնարավոր է իրականացնել հաշտարարության ամբողջ գործընթացը։
«Մեր երկրում ընտանեկան որոշ գործերով գործում է պարտադիր հաշտարարության համակարգ, և կա համապատասխան թվային հարթակ, որի միջոցով հաշտարարության գործընթացը կարող է տեղի ունենալ»,- նշել է Գալյանը։
Նրա տեղեկացմամբ՝ ներկայումս հաշտարարությանն ուղղված դիմումների շուրջ 30 տոկոսի քննությունն ավարտվում է հաշտության համաձայնությամբ։
«Սա նշանակում է, որ դեպքերի շուրջ 30 տոկոսի դեպքում գործերը չեն հասնում դատարան, ինչի արդյունքում դատարանները թոթափում են լրացուցիչ ծանրաբեռնվածությունը և կարողանում են կենտրոնանալ այլ գործերի քննության վրա»,- ընդգծել է նախարարը։
