Մեծ Բրիտանիայի ազգային արխիվներում հայտնաբերվել են գաղտնի փաստաթղթեր
Լրագրողները Մեծ Բրիտանիայի ազգային արխիվներում հայտնաբերել են նախկինում գաղտնի փաստաթղթեր, որոնք վերաբերում են ռազմական հետախուզության հանդիպումներին չբացահայտված թռչող օբյեկտների հետ Բելգիայում՝ 1990-ական թվականներին։ Այս մասին հայտնում է բրիտանական The Sun պարբերականը։
Պաշտպանության նախարարության 1997 թվականին կազմված ներքին փաստաթղթում նկարագրվում են Բելգիայի անտառների վրայով թռչող սև եռանկյունաձև օբյեկտներ, որոնք պաշտոնապես գրանցվել են որպես անհայտ օդային երևույթներ։
Փաստաթղթում նշվում է, որ եթե զգալի թվով մարդիկ հայտնում են երկնքում տարօրինակ օբյեկտների դիտարկման մասին, ապա դրա համար կարող է իրական հիմք լինել։ Ըստ զեկույցի՝ նման անհայտ երևույթները կարող էին պոտենցիալ սպառնալիք ներկայացնել ազգային պաշտպանության համար, քանի որ դրանց ծագման և բնույթի վերաբերյալ որևէ հստակ տեղեկատվություն չի եղել։
Նշվում է նաև, որ դեռևս 1980-ական թվականներից մի շարք երկրների, այդ թվում՝ Միացյալ Նահանգների, զինվորականներ հայտնել են Բելգիայի երկնքում հազարավոր սև եռանկյունաձև օբյեկտներ տեսնելու մասին։ Նմանատիպ դեպքեր արձանագրվել են նաև Մեծ Բրիտանիայում։
