Թույլատրվել է Միքայել արքեպիսկոպոս Աջապահյանի տեղափոխումը բժշկական կենտրոն․ Դանիելյան

Քիչ առաջ հայտնի դարձավ, որ «Քրեակատարողական բժշկության կենտրոն» ՊՈԱԿ-ը թույլատրել է Միքայել արքեպիսկոպոս Աջապահյանի տեղափոխումը «Իզմիրլյան» բժշկական կենտրոն, որտեղ էլ կիրականացվի վերջինիս վիրահատությունը։ Այս մասին գրել է ԱԺ «Հայաստան» խմբակցության պատգամավոր Գառնիկ Դանիելյանը։

«Նշեմ, որ մինչ այս պահը արհեստականորեն բարդացվում էր գորընթացը։ Պաշտպանները մի քանի անգամ դիմելով ՔԿԾ-ի «Քրեակատարողական բժշկության կենտրոն» ՊՈԱԿ-ին՝ չէին կարողանում ստանալ անհրաժեշտ թույլտվությունը, որպեսզի Սրբազանի վիրահատությունն իրականացվի իր նախընտրած ԲԿ-ում։

Ինքս օրեր առաջ պատկան մարմիններին անձամբ եմ տեղեկացրել, որ Միքայել Սրբազանն ունի անհետաձգելի վիրահատության կարիք՝ հորդորելով, որ ժամ առաջ ապահովվի նրա առողջության իրավունքը։ Պաշտպանների, ինչպես նաև՝ հանրային լայն արձագանքի շնորհիվ կարողացանք փոխել անարդարացի մոտեցումը։ Շնորհակալ եմ բոլոր մտահոգ քաղաքացիներին։ Անտարբերության պատնեշը պետք է ջարդվի։ Փաստ է, որ մեր միասնականությունը տալիս է իր արդյունքները։ Քաջառողջություն, շուտափույթ ապաքինում և ազատություն մեր սիրելի Սրբազանին և բոլոր քաղբանտարկյալներին»,-գրել է նա։