Համբուրգի նավահանգիստը հետաքրքրված է Գյումրիում չոր նավահանգիստ ստեղծելու նախագծով. վարչապետ

Համբուրգի նավահանգիստը ներգրավվում է և հետաքրքրված է Գյումրիում չոր նավահանգիստ ստեղծելու նախագծով: Այս մասին Համբուրգում լրագրողների հետ զրույցում հայտնել է վարչապետ Նիկոլ Փաշինյանը:

«Իրենք վերահաստատեցին, որ այդ հետաքրքրությունը առավելևս հիմա տարածաշրջանային նախագծերի համատեքստում ավելի է ակտիվացել, և այդպես շարունակ:

Բավական ծանրակշիռ թեմաներ և օրակարգ է ձևավորվել այցի արդյունքներով»,- ասել է վարչապետը: Նիկոլ Փաշինյանը թվարկել է նաև քննարկված այլ թեմաներն ու հարցերը: Մասնավորապես՝ Եվրասիական տնտեսական միությունից դուրս գալը։

«Մենք հասկանում ենք, որ Եվրասիական տնտեսական միության և ԵՄ միաժամանակյա անդամակցությունը հնարավոր չէ, և հասկանում ենք, որ կա ինչ-որ մի կետ, որ պետք է որոշում կայացնենք: Բայց այսօր այդ կետը չէ: Այսօր նման որոշում կայացնելու անհրաժեշտություն չկա, իսկ եթե չկա՝ ինչու կայացնենք»,- ասել է վարչապետը:

Նիկոլ Փաշինյանը զրույցի ընթացքում նշեց՝ Համբուրգից մեկնելու է Մոսկվա՝ մասնակցելու Եվրասիական տնտեսական միության միջկառավարական խորհրդի նիստին: