Բաքուն ներկայացրել է իր պահանջները Ռուսաստանին․ պաշտոնական ներողություն ենք ակնկալում․ Հաջիև

Ադրբեջանի նախագահի օգնականը և նախագահի վարչակազմի արտաքին քաղաքականության բաժնի ղեկավար Հիքմեթ Հաջիևը Բրյուսելում անդրադարձել է Բաքու–Մոսկվա հարաբերություններին։ EU Today-ին տված հարցազրույցում նա հիշեցրել է, որ անցած տարվա դեկտեմբերին Ռուսաստանի օդային տարածքում ադրբեջանական ինքնաթիռի խոցումից հետո առաջացել էին զգացմունքային արձագանքներ և որոշ թյուրըմբռնումներ։

Հաջիևի խոսքով՝ միջադեպից բխող մտահոգությունները ներկայացվել են Ռուսաստանի ղեկավարությանը և քննարկվել Տաջիկստանում ղեկավարության մակարդակով։ Ադրբեջանի կողմը հանդես է եկել չորս պահանջով՝ պաշտոնական ներողություն, միջադեպի համակողմանի քննություն, պատասխանատուների պատասխանատվություն և պատճառված վնասի փոխհատուցում։

Ադրբեջանի նախագահի օգնականը նշել է, որ այս հարցերի լուծման դեպքում կողմերը կարող են փակել ձևավորված անհասկացվածության էջը և շարունակել երկկողմ հարաբերությունները որպես բարիդրացի երկիրներ։