Ադրբեջանը կխորացնի հարաբերությունները Իրանի հետ․ Հիքմեթ Հաջիև

Ադրբեջանը նպատակ ունի խորացնել հարաբերությունները Իրանի հետ՝ հատկապես տնտեսական և առևտրային ոլորտներում։ Այս մասին Բրյուսելում EU Today-ին տված հարցազրույցում հայտարարել է Ադրբեջանի նախագահի օգնականը և նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։

Նա անդրադարձել է Թեհրանում Ադրբեջանի դեսպանատան վրա կատարված հարձակմանը՝ նշելով, որ հաղորդված տվյալներով, հարձակվողը դատապարտվել է Իրանի օրենսդրության համաձայն։ Հաջիևի խոսքով՝ Բաքուն այս միջադեպը համարում է փակված էջ և չի դիտարկում այն որպես խոչընդոտ երկկողմ համագործակցության համար։

Հաջիևը երկու երկրների հարաբերությունները բնութագրել է որպես նորմալ և կայուն՝ ընդգծելով Ադրբեջանի նախագահ Իլհամ Ալիևի և Իրանի նախագահ Մասուդ Փեզեշքիանի  միջև ձևավորված աշխատանքային վստահությունը։ Նա նշել է, որ Արազ գետի և Իրանի տարածքով անցնող Աղբանդ - Կալալա կամուրջի նախագիծը ընդգրկված է Ադրբեջանի տարածաշրջանային կապի նախաձեռնություններում, իսկ դրա վերջնական կառուցվածքը կհաստատվի 2025 թվականի ընթացքում։

«Իրանին մենք դիտարկում ենք որպես հարևան և գործընկեր, և ուշադրություն ենք դարձնում մեր տնտեսական ու առևտրային կապերի ընդլայնմանը», – ասել է Ադրբեջանի նախագահի օգնականը և նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։