Զելենսկին Երմակի փոխարեն պատվիրակության ղեկավար է նշանակել Ռուստեմ Ումերովին
Ուկրաինայի նախագահ Վլադիմիր Զելենսկին փոփոխություններ է կատարել «խաղաղության պլանի» շուրջ բանակցությունների պատվիրակության կազմի մասին հրամանագրում։ «Եվրոպեյսկայա պրավդայի» փոխանցմամբ՝ նախագահի կայքում հրապարակված հրամանագրով պատվիրակության ղեկավարի պաշտոնում Անդրեյ Երմակին փոխարինել է Ազգային անվտանգության և պաշտպանության խորհրդի քարտուղար Ռուստեմ Ումերովը։
Նոյեմբերի 22-ին Զելենսկին ստորագրել էր հրամանագիր՝ ստեղծելով պատվիրակություն, որը պետք է մասնակցեր ԱՄՆ-ի, Ուկրաինայի այլ միջազգային գործընկերների և Ռուսաստանի ներկայացուցիչների հետ «արդար և կայուն խաղաղության» շուրջ բանակցություններին։ Սկզբում պատվիրակությունը ղեկավարում էր նախագահի աշխատակազմի ղեկավար Անդրեյ Երմակը։
Թարմացված հրամանագրով պատվիրակության կազմում ընդգրկված է նաև Ուկրաինայի պաշտպանության նախարարության գլխավոր հետախուզական վարչության պետի տեղակալ Վադիմ Սկիբիցկին։ Նախագահի գրասենյակը հայտնել է, որ նոյեմբերի 29-ին Ումերովը արդեն զեկույց է ներկայացրել նախագահին՝ ամերիկյան կողմի հետ հանդիպումների նախապատրաստական աշխատանքների վերաբերյալ։ Ըստ գրասենյակի՝ ուկրաինական պատվիրակությունն արդեն մեկնում է Միացյալ Նահանգներ։
Bloomberg-ը տեղեկացրել է, որ պատվիրակությունը լինելու է Ֆլորիդայում, որտեղ կհանդիպի ԱՄՆ նախագահի դեսպանորդ Սթիվ Ուիթքոֆի և Դոնալդ Թրամփի փեսա Ջարեդ Քուշների հետ։ Axios-ի տվյալներով՝ Երմակը նախատեսում էր մեկնել ԱՄՆ՝ «խաղաղության համաձայնագրի» շուրջ բանակցություններ վարելու նպատակով, սակայն մեկ օր առաջ հրաժարական էր տվել նախագահի գրասենյակի ղեկավարի պաշտոնից։
Ուրբաթ օրը Զելենսկին պաշտոնանկ է արել Անդրեյ Երմակին՝ կոռուպցիայի դեմ պայքարի մարմինների կողմից վերջինիս տանը խուզարկություններից հետո։
