ՏԵՍԱՆՅՈՒԹ. Հայկ Մարությանն ինձ թիկունքից հարվածել է. Նիկոլ Փաշինյան

Ես երբեք Հայկ Մարությանին կասկածով չեմ վերաբերվել: Այս մասին այսօր Հանրայինի եթերում ասել է վարչապետ Նիկոլ Փաշինյանը՝ պատասխանելով նախկին քաղաքապետի և Երևանի ավագանու առաջիկա ընտրություններում ՔՊ–ի թեկնածու Տիգրան Ավինյանի միջև զուգահեռների վերաբերյալ հարցին:

«Մինչև այսօր Հայկ Մարությանը չի նայել իմ աչքերի մեջ և չի ասել, թե ինչպես է, որ ես շեղվել եմ հեղափոխության արժեքներից, էտ ինչպես է, որ ես դարձել եմ սև, ինչպես ինքն է նշում»,– ասել է Փաշինյանը:

Նա նշել է, որ Հայկ Մարությանն իրեն թիկունքից հարվածել է, Ավինյանը՝ պինդ պահել: «Էս խոսակցությունն ինձ համար քաղաքականության մասին չէ, այլ առաջին հերթին մարդկային պարզ հարաբերությունների»,– ասել է նա:

«Այն ժամանակ ես լիարժեք վստահությամբ էի վերաբերվում Հայկ Մարությանի` մոտիկ լինելու ցանկությանը։ Ի հեճուկս մեր բազմաթիվ թիմակիցների, որ ասում էին՝ նա գալիս է որպես «գաստրալյոր» և իրադրության փոփոխության դեպքում հին սցենարը մի կողմ է թողնելու։ Այդ ընկերությունը լավ ժամանակների ընկերություն էր»:,– ասել է նա:

Իր խոսքով՝ Մարությանն իր բեմական կարիերայում առաջին անգամն է, որ քաղաքական ժանրի հումոր է անում և բովանդակությունը չի համաձայնեցնում այդ հումորի հերոսների հետ. «Դա վկայում է, որ Հայաստանը հեղափոխական ճիշտ ճանապարհից չի շեղվել»։