Ռուսական ԱԹՍ-ների հարվածների հետևանքով Կիևում բնակելի շենքեր են վնասվել, հրդեհներ են բռնկվել. կան զոհեր

Ուկրաինական լրատվամիջոցների հաղորդմամբ՝ հարվածների հետևանքով Կիևում կան զոհեր ու վիրավորներ, ավիրվել են բնակելի շենքեր։ Քաղաքապետ Վիտալի Կլիչկոն հայտնել է, որ Գոլոսիևսկի, Սոլոմոյանսկի և Դարնիցկի շրջաններում հրդեհներ են բռնկվել ոչ բնակելի կառույցների և բաց տարածքների վրա ընկած բեկորների պատճառով։ Նա նշել է, որ հարձակման հետևանքով մայրաքաղաքի որոշ հատվածներում տեղի են ունենում էլեկտրաէներգիայի անջատումներ։

«Դարնիցկի շրջանում հրթիռի բեկորները ընկել են ինը հարկանի շենքի բակում։ Շենքի վեցերորդ հարկում հրդեհ է բռնկվել։ Դեպքի վայր են ուղարկվել արտակարգ ծառայություններ»,- գրել է Կլիչկոն։

Միաժամանակ, Ուկրաինայի ազգային ոստիկանությունը տեղեկացրել է, որ Սվյատոշինսկի շրջանում անօդաչու թռչող սարքի անկումը առաջացրել է հրդեհ և շենքի մասնակի ոչնչացում։

«Փրկարարները փլատակներից դուրս են բերել 42-ամյա տղամարդու դի։ Տասնմեկ մարդ վիրավորվել է, այդ թվում՝ 10-ամյա երեխա։ Ոստիկանության և արտակարգ իրավիճակների պետական ծառայության աշխատակիցները տեղում աշխատում են՝ օգնություն ցուցաբերելով վիրավորներին և փաստաթղթավորելով թշնամու հրետակոծության հետևանքները», - նշված է իրավապահների հաղորդագրությունում։

Ավելի ուշ հաղորդվել է, որ զոհերի թիվը հասել է երկուսի։